Ōranziska dēinas lēlija / orange day-lily.

Labban dēinan! Teinū mes dirēimai en stawīdan kwēitjan. Kāigi šis kwēitis ast bilīts prūsiskai mes dabber ni spārts waīdimai, adder sta ast stawīda lēlija, kāigi Pēteris Klammans nūmans peisāwuns - en Mazūramans zmānentjai amziskai bilāi ezze stawīdans kwēitjans - Mēlinanāsi, Mēlina Nasī anga Niskistā nasī. Be as stwi teinū stalīwuns be dirīwuns kasse paggan zmānentjai mazēi tērpautun stawīdan emnin kāigi Mēlinanāsi. Anga sta ast palīgu nāsjai? Mennei ni spārts palīgu. Tēr as dirēi, kāi stwen ēntrai šī lēlija turri geltāinans nektarans anga geltāinans kweitāpuslins, kawīdans senrīnka bittis. Be as teinū bandāwuns sen swāise nāsjan enlēztwei en stan kwēitjan, wōstun. Be panzdau as paprettuns, kāi na māise nāsjan stawīdas geltāinas kweitāpuslis. Tēt mazzi būtwei stesse paggan. Adder kittapausiskai, mennei perwaidinnas, en erainasmu kwēitju ast nektars be puslis. Be zentli ezze eraīnan kwēitjan mazīngi bilītun, kāi sta ast “mēlinanāsi”, ik stwen enlēztwei sen swāise nāsjan ēntrai.
En Eurōpai šis kwēitis tikka en 16 mts. Bēi perwezts iz Āzijan. Perwaidinnas, iz Kīnijan. Adder stwi en Prūsai arwiskai ast deīktiska lēlija. Stawīda paustā lēlija. Teinū as ni etminijja si, ni waīda kāigi tenā ast bilitā. Dabber prawerīlai ezze tennan tūls waītun… Adder ka ast interessanti, šis kwēitis tūlan kwēi ast bilīts kāigi “dēinalēlija” anga “dēinas lēlija”. Be stwi ast stawīda preslē, stawīds prāts, kāi šis kwēitis turri giwītwei tēr aīnan dēinan be kittan dēinan tīnka kits kwēitis. Kāigi as stwi teinū dirēi - arwiskai ast tūlan stawīdai, kawīdai dabber ni bēi kwittusis.
Ka ast dabber interessanti, sta ast stawīda pawīsts, kāi šāi kweitjāi mazzi aūgtwei stwi subbai. Ikāigi ni spārts prawerru ka nika speciālai stwi segītun per tennans. Tenēi subbai spārts labbai aūga. Ni prawerru per tūlan zurgautwei per tennans, stwen ka nika segītun. Be ik konkrētais, stawīdai kweitjāi, kwei as teinū stalāi, en stesmu deīktu subbai aūga zūrgi 100 mettans arwiskai. Beggi en stesmu deīktu, en Sūdawai, bēi ainuntkadāi wāran buttan. Be prei buttan, kāigi praktiskai en pastippai Prūsai prei eraīnan buttan, aūga stawīdai kweitjāi. Be ēst eraīnan buttan turēi stans kwēitjans. Tēt dīgi stwi. Zmānes stwi ni buwinna jāu tūlan tūlan mettans. Adder šāi kweitjāi aūga sebbei spārts deiwūtiskai be tenēimans ni spārts ast prawerīngi ainuntkawīda pagalba.
Ka dabber as endirīwuns šin mettan, sta ast, kāi pirms kwēitis iz stans kwēitjans bēi kwittuns entikriskai en Kaupālin, zentlim en Daggas Sauliswārstan. Mazīngi gērdautun, kāi per Prūsan sta ast stawīds kaupālisks kwēitis. Signalizijja, kāi ast jāu Kaupāli. Adder arwiskai ast spārts grazzus kwēitis. Be kelli as dirēi en tennan, dabber tūls be tūls kwaitēi dirītwei be stalītwei zūrgi tennan. Hipnōzi ast ainuntkawīda iz stan kwēitjan. Grazzus.
Jā, adder ainawīdan šis kwēitis ast kultūrisks be en pāustai dabbai prēi mans en Baltijai stwi ni bēi subs sebbei. Adder prawerīlai waidīntun stan autēntiskan deīktiskan lēlijan, kawīda arwiskai ast iz nūsans meddjans be ni ast kultūriska adder arwiskai ast spārts paustā. Be arwiskai aūgusi stwi tūlan simtans mettans.
Stawīdas ast pamērisnas ezze stawīdan dēinas lēlijan, kawīda jāu zūrgi simtan anga dwisimtans mettans en Prūsai, tēt dīgi wiskwēi en ebzūrgiskamans, ast spārts populārs kwēitis.
Wisēimans grazzjan dēinan! Deiwadeiwūtiskan. Ērdiw!

Видео Ōranziska dēinas lēlija / orange day-lily. канала Prūsiska Tāliwidāsna