ចោរប្លន់ប្រដាប់អាវុធម្នាក់ ក្នុងចំណោម បក្ខពួក៥នាក់ដែលត្រូវចាប់ខ្លួន មានប្រវត្តិមិនធម្មតា#Socialmedia

ជនសង្ស័យម្នាក់ ក្នុងចំណោមបក្ខពួក ៥នាក់ ដែលត្រូវបានកម្លាំងសមត្ថកិច្ចចាប់ខ្លួន ក្នុងប្រតិបត្តិការបង្ក្រាបមុខសញ្ញាក្រុមចោរប្លន់ កក្រើកក្រុងកំពង់ចាម ត្រូវបានមន្រ្តីអាវុធហត្ថ ទម្លាយអត្តសញ្ញាណឱ្យដឹងថា ធ្លាប់មានប្រវត្តិជាប់ពន្ធនាគារ រយៈពេល ១៨ឆ្នាំ ពីបទឃាតកម្ម នៅពន្ធនាគារត្រពាំងផ្លុង។

កម្លាំងស្នងការដ្ឋាននគរបាលខេត្តកំពង់ចាម សហការជាមួយ កម្លាំងបញ្ជាការដ្ឋានកងរាជអាវុធហត្ថខេត្ត នៅព្រឹកថ្ងៃទី២៥ ខែកុម្ភៈ ឆ្នាំ២០២៥នេះ បានចុះបង្ក្រាបមុខសញ្ញាចោរប្លន់ប្រដាប់អាវុធនៅស្រុកកំពង់សៀម និងបានឡោមព័ទ្ធផ្ទះជនសង្ស័យ ស្ថិតនៅភូមិឡឥដ្ឋ សង្កាត់បឹងកុក ក្រុងកំពង់ចាម ខេត្តកំពង់ចាម។

ក្នុងរង្វង់ប្រតិបត្តិការនេះ កម្លាំងសមត្ថកិច្ច បានចាប់ខ្លួនជនសង្ស័យចំនួន ៥នាក់ និងក្មេងតូចម្នាក់។ ការបង្ក្រាបក្តៅគគុកនេះ ជនល្មើសប្រដាប់ដោយអាវុធខ្លី K54 បាញ់រះជាច្រើនគ្រាប់ មកលើសមត្ថកិច្ច បណ្ដាលឲ្យមន្រ្តីនគរបាល ១រូប រងរបួសគល់ភ្លៅ ធ្លាយឆ្អឹង ត្រូវបាននាំមកសម្រាកព្យាបាលនៅមន្ទីរពេទ្យខេត្ត។

ដោយឡែក នៅរសៀលថ្ងៃទី២៥ ខែកុម្ភៈ ឆ្នាំ២០២៥នេះ លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានបញ្ជាក់ឱ្យដឹងបន្ថែមថា ជនសង្ស័យម្នាក់ ក្នុងចំណោម បក្ខពួក ៥នាក់ ដែលបានអះអាងថាខ្លួនជាអតីតកងរាជអាវុធហត្ថ មានឈ្មោះពិត អែម នាង ហៅប្រេស៊ីល មុខរបរអ្នករត់តាក់ស៊ី និងជាបុគ្គលិកវិញ។

ជននេះ រស់នៅភូមិកំពង់ឫស្សី ឃុំជីរោទិ៍ ស្រុកត្បូងឃ្មុំ ខេត្តត្បូងឃ្មុំ និងបច្ចុប្បន្នស្នាក់នៅផ្ទះកើតហេតុ។ មិនត្រឹមតែប៉ុណ្ណោះ ឈ្មោះអែម នាងនេះ ធ្លាប់ជាប់ពន្ធនាគារ រយៈពេល ១៨ឆ្នាំ ពីបទឃាតកម្ម នៅពន្ធនាគារត្រពាំងផ្លុង។ជនសង្ស័យ បានអះអាងថា បានចូលបម្រើអាវុធហត្ថ នៅឆ្នាំ១៩៩៣ វគ្គទី១ បានរត់ចោលជួរ នៅឆ្នាំ១៩៩៩។ តែបើតាមការស្រាវជ្រាវរបស់ជំនាញបុគ្គលិកកងរាជអាវុធហត្ថលើផ្ទៃប្រទេស ឈ្មោះ អែម នាង មិនមានក្នុងបញ្ជីគ្រប់គ្រងកងរាជអាវុធហត្ថទេ។
អ្នកនាំពាក្យកងរាជអាវុធហត្ថបានឱ្យដឹងបន្ថែមថា ទាក់ទងករណីនេះ ជំនាញនគរបាលខេត្តកំពង់ចាម កំពុងបន្តនីតិវិធីតាមផ្លូវច្បាប់។

Видео ចោរប្លន់ប្រដាប់អាវុធម្នាក់ ក្នុងចំណោម បក្ខពួក៥នាក់ដែលត្រូវចាប់ខ្លួន មានប្រវត្តិមិនធម្មតា#Socialmedia канала Social Media