Лаңкестер өмір бойына бас бостандықтарынан айырылды

Алғашқы сот отырысы дәл осы жерде өткен болатын. Ол кезде ғимаратқа жәбірленушілер мен куәгерлер кіргізілді. Кейін қауіпсіздікті қамтамасыз ету мақсатында сот отырысы тергеу абақтысында жалғасты. Ал бүгін сотталушылардың ата-аналары мен тілшілер сот залына кіруге мүмкіндік алды. Құқыққорғаушылардың қолындағы тізімге ілікпегендері есік аузынан кері қайтты. Ішке енгендері жеке-жеке тексеруден өтті. Әйелдер бөлек, ерлер бөлек тексерілді. Сот залына жеткенше 4 тексеру жүргізілді.Судья Нұрлан Сұлтанов алғашқы жарты сағатта қылмыс жасаған 9, қылмысты жасырған 18 және қылмыскерлерге пана болған екі сотталушыға тағылған айыпты оқыды. Олар ҚР Қылмыстық Кодексінің «Террористік топ құру, оған басшылық ету және лаңкестікке қатысу», «Террористік, не экстремистік әрекетті ұйымдастыру мақсатында адамдарды азғырып- көндіру немесе даярлау, не қаруландыру», «Қаруды, оқ-дәрілерді, жарылғыш заттар мен жарылыс құралдарын жымқыру, не қорқыту», «Билік өкіліне қатысты күш қолдану», «Терроризм актісі», «Әлеуметтік, ұлттық, рулық, нәсілдік, тектік-топтық немесе діни алауыздықты қоздыру» секілді бірнеше бап бойынша айыпты деп танылды. Сотталушы Жаңабай Қуанышбаев, Әлібек Ақпанбетов, Арсен Таңатаров, Асхат Рахметов, Ануар Садихов, Асхат Иманғалиев және Бақыт Қуанышбаев өмір бойы бас бостандықтарынан айырылды. Жазаларын ерекше режимдегі түзету колониясында өтейді.Ал қолына қару алып, қылмыс жасаған Азамат Әбдірахманов пен Айдос Жұбановтар 20 және 22 жылға бос бостандықтарынан айырылды. Судья олардың лаңкестік шабуылдың соңына дейін қатыспағанын ескерді. Жалдамалы пәтерге барып, үндеуді тыңдап, қарулы қақтығыс жасайтындарын білген 18 сотталушы 2 жылдан 5 жылға дейін бас бостандықтарынан айырылды. Қылмыскерлерді жасырып, оларға пәтер жалдап берген Мирлан Ердауов 4 жылға бас бостандығынан айырылды. Ол жазасын жалпы тәртіптегі колонияда өтейді. Ал күні бүгінге дейін қаладан шықпау туралы қолхатпен үйінде жүрген сотталушы Үсен Өтепов бостандықта қалды. Сот Өтеповке төрт жылға бас бостандығын шектеу туралы үкім шығарды.

Видео Лаңкестер өмір бойына бас бостандықтарынан айырылды канала РИКА ТВ