Шаян ауылының кәсіпкерлері әкімдік салып бастаған қорғанның құрылысына қарсы шықты

Түркістан облысының Шаян ауылындағы дүкен сатушылары әкімдік қолға алған қорғанның соғылуына жаппай қарсы шықты. Билік басты көшедегі дүкендердің сыртқы көрінісі ала-құла, оны біркелкі етеміз деп іргеден биіктігі төрт метрлік қабырға көтере бастапты. Ал сатушылар бұл абаттандыру емес, шағын бизнесті тұншықтыру деп отыр.
Шаяндағы сауда қатарларындағылар әкімдіктің әй-шай жоқ қорған соға бастағанына наразы. Олар абаттандыру екі жақты келісіммен жасалуы тиіс деп есептейді. Саудагерлер дүкендердің келбеті көшенің көркін бұзса, жоба ұсынсын. Ажарын келтіруге шамамыз жетеді дейді. Наразы топ әкімдіктің көппен санаспай биік қоршау көтеруі - абаттандырудан гөрі, кәсіпті тұншықтыруға ұқсайтынын айтады.
ӘБДІЖАППАР САБАНШИЕВ, Бәйдібек ауданының тұрғыны
– Бұл біріншіден саудамызға кесірін тигізіп жатыр. Жасыратын түгі жоқ. Бұл әншейін, шындап келгенде, бұл қаражатқа мемлекетке керек нәрсе салмайды ма?
Қоршаудың сауда қатарына тым жақындығы да дүкен иелерін ашындырып тұр. Өрт шыға қалса, көлік қайдан кірмек дейді.
БАҚЫТ ТҰҢҒАТОВ, Бәйдібек ауданының тұрғыны:
– Қараңыз міне, заборлардың қандай биік екенін. Бұл біріншіден. Екіншіден мынаны қазір соғып жатыр. Бұл енді ұят та болса айтайық, әжетхана болып жатыр мынау түнге қарай. Келеді, адам білгенін істеп кетіп жатыр мына жерде. Ештеңе көрінбейді, ол ешкім қадағаламайды түн жарымда.
Кәсіпкерлер тіпті бізге сәулеттік жоба ұсынса, осы дуалдарға миллиондарды жұмсамастан, шығынды көтерер едік дейді. Бұдан бөлек жобаға шлакоблок секілді арзан құрылыс затын қолдануы, қауіпсіздік тұрғысынан қате екенін айтып отыр. Ал билік құны 31 миллион 242 мың теңгені құрайтын абаттандыру жобасымен кәсіп иелерін алдын-ала таныстырғанбыз деп түсіндірді.
МАРАТ ЕНЖАНОВ, Бәйдібек аудандық әкімдігінің бөлім басшысы
– Барлық эскиздік жобалары бар бұл жобаның. Құны, ертең қалай түседі, алдынан қалай қоршалып түседі, биіктігі қандай болады, ені, есіктері қалай түседі, терезелері, барлық жобаның эскиздік жобаларымен көзбе-көз қолдарына таныстырылған болатын.
Әкімдіктегілер кәсіп иелеріне жобамен танысқандығы туралы хабарламаға қол қойдырмағанын мойындады. Сондықтан, ендігі мәселені түсіндіру жолымен шешеміз деп сендірді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Шаян #кәсіпкерлер_наразылығы

Видео Шаян ауылының кәсіпкерлері әкімдік салып бастаған қорғанның құрылысына қарсы шықты канала Информбюро 31