İqbal Ağazadə:"Qazanın qapağı açılmamış tikənin ən yaxşısını evin kişisinin qarşısına qoyurduq."

UMID MEDIA-nın “Sual-cavab” rubrikasında “Cəmiyyəti dəyişmək istiqamətində vətəndaşların missiyası nədir?” sualına Ümid Partiyasının sədri İqbal Ağazadə cavab verib. umidparty.org həmin cavabı izləyicilərə təqdim edir:
Vətəndaşın burada missiyası yoxdur. Vətəndaşın edə biləcəyi dinləmək və ümumi- çox adamın dediyindən sonra nəticə çıxarmaqdır. Gəlin, bir anlıq düşünək. Bir gün Molla Nəsrəddin inəyini bazara çıxardır. 40 lotu qərara alır ki, Molla Nəsrəddinin inəyini ucuz qiymətə keçi adıyla alaq. Biri yaxınlaşıb soruşur ki, molla, bu keçinin qiyməti neçəyədir? Molla deyir ki, görmürsən bu inəkdir? Adam deyir, a kişi, keçidir bu və çıxır gedir. İkincisi, üçüncüsü, beşincisi bu minvalla yaxınlaşıb Molladan keçinin qiymətini soruşurlar. Molla çəkilir bir az kənardan inəyə baxır, düşünür, neçə il qapımda inək adıyla keçi saxlamışam, xəbərim olmayıb. Tez-tələsik inəyi keçi qiymətinə satır və evə qayıdır. Arvadı deyir, bazar olsun, nə oldu, inəyi satdın deyəsən. Molla deyir, ay arvad, inək nədir? Biz neçə il keçi saxlamışıq, xəbərimiz də olmayıb. Yaxşı ki, keçi qiymətindən bir az baha qiymətə satdım, gəldim.
Bir cəmiyyətdə bir ziyalı, alim, professor yalanı cəmiyyətə təqdim edən bir səlahiyyət sahibinin yalanlarını min dəfə vətəndaşa, seçiciyə deyirsə, vətəndaşın inanmaqdan başqa çarəsi qalmır. Ziyalı, elmi tədqqiqatları tədris olunan alimlərimiz, əsərlərini oxuduğumuz o insanlar düşünməlidir bunu. Onlar da müxalifətin və ya iqtidarın yanında dayanmamalıdırlar, həqiqətin yanında dayanmalıdırlar. Əslində, cəmiyyətin orbitrları, hakimləri onlardır. Gerçək sözün nə dərəcədə əhəmiyyətli və doğru olduğunu, ağın ağ, qaranın qara olduğunu göstərən məhək daşı onlardır. Təəssüflər olsun ki, bu gün o adamların böyük əksəriyyəti yalanın yanında dayanır, bir qismi də qarşı tərəfin siyasi iddiası tərəfində dayanır. Həqiqətlərin yanında dayanan çox az adam var. Cəmiyyət ona görə öyrənə bilmir. O nümunələri doğru-dürüst cəmiyyət ortaya qoymayana qədər oyanış çətin olacaq. Yenə deyirəm, biz hakimiyyəti dəyişəcəyik, amma bizim sonrakı münasibətlərdə ən çətin işimiz insanlara mənim yanımda yox, həqiqətin yanında “dur”u öyrətməkdir. Çünki tarix yaranandan bugünə qədər, Cümhuriyyətin süqutundan bugünə qədər, bizə, cəmiyyətin böyük bir kəsiminə hakimiyyətlərin yanında durmağı öyrədiblər. Onlar da əvvəl atalar sözlərimizdə də var idi. Bilirsiniz ki, insanlar bir az da folkloru ilə tərbiyə olunur, milli mental dəyərləri formalaşdıran bir az da folklordur. Məsələn, “Göydə Allah, yerdə şah”. Bu mental dəyərlərlə tərbiyə olunub insanlar. O tərbiyənin nəticəsində də hamı hakimiyyətin yanında dayanıb və qazanıb. Qazandıqca da sayılıb. Bu gün bir kəndə gedin. O kəndin malını oğrayan kimdi? İcra nümayəndəsidir, bələdiyyə nümayəndəsidir, sahə müvəkkilidir, məktəb direktorudur və s. o kəndin ən hörmətli hesab olunan adamları da onlardır. Çox təəssüf ki... Bu sistemi növbəti hakimiyyət dəyişə biləcəkmi, yoxsa o da ənənəni davam etdirəcək? Davam etdirəcəksə, Azərbaycanda oyanış olmayacaq. Yenə də köhnə qəlib, köhnə şüur, köhnə düşüncə qalacaq, sadəcə idarə edənləri dəyişəcək. Hakimiyyəti dəyişmək çətin deyil. Çətin olan cəmiyyəti dəyişməkdir. Biz insanlarımıza, hətta müəlllimimizə, ziyalımıza, alimimizə, hətta bir partiyamızda belə insanlara doğruları de, doğrular üçün vuruş deyə öyrədə bilmirik, çünki bu cür böyümüşük. Çıxışlarımın birində bir dəfə də demişdim. Hakimiyyətimizin rüşvət almasına, iqtidarlarımızın varlı olmasına niyə cəmiyyət təhəmmül edir, onu sakit, normal qarşılayır? Qazanın qapağı açılmamış tikənin ən yaxşısını evin kişinin qarşısına qoyublar, uşağa isə qanadından, quyruğundan, suyundan veriblər. Bunu dəfələrlə görmüsünüz. Sanki biz quldarlıq dövründə, ibtidai icma quruluşunda yaşayırıq və tikənin ən yaxşısını ona görə kişiyə veririk ki, o fiziki cəhətdən güclü olsun,gedib ov etsin, şirlə, pələnglə, ayı ilə vuruşa bilsin. Fiziki imkanını itirməsin ki, tayfaya yemək gətirə bilsin. Halbuki yeməyin ən yaxşısı uşağa verilməlidir. Əgər evin böyüyü kişidirsə, tikənin yaxşısını o yeyirsə, cəmiyyətin də böyüyü iqtidardır, onun da çox yeməsinə cəmiyyət çox rahat təhəmmül edir. Bu tərbiyələrdən zaman-zaman imtina etməyi düşünməliyik, bacarmalıyıq. Hələlik bunlar yoxdur. Hələlik biz daha çox hakimiyyət dəyişikliyi ilə məşğuluq. Niyə onunla məşğuluq? Çünki bu yerimizdə o dediyimiz tərbiyəni, cəmiyyət nümunələrini göstərmək imkanlarımız olduqca məhduddur.

Видео İqbal Ağazadə:"Qazanın qapağı açılmamış tikənin ən yaxşısını evin kişisinin qarşısına qoyurduq." канала İqbal Ağa-zadə