ЖАРЫЛЫСТАН КЕЙІНГІ ТӨРТІНШІ КҮН. ҚАЙТЫС БОЛҒАНДАР САНЫ ОН ТӨРТКЕ ЖЕТТІ.

Бүгін жалпыұлттық аза тұту күні. Таң сәріден барлық мемлекеттік мекемелердің туы түсіріліп, тұрғындар қалалық өрт сөндіру бөлімшесі алдына қойылған жарылыс кезінде қаза тапқан батырлардың суреттінің қасына гүл шоқтарын қойып, тағзым етті. Президент Мейіржан Аймановқа «Халық қаһарманы» атағын беріп, апат кезінде көз жұмған қызметкерлерді «Айбын» орденімен марапаттау туралы жарлыққа қол қойды. Ал облыстық шіркеуде шырақ жағылып, мешітте жер қойынына тапсырылған азаматтардың аруақтарына құран бағышталды.
НҰРӘЛІ БАҚЫТҰЛЫ – ОРТАЛЫҚ ҺИБАТУЛЛА ТАРАЗИ МЕШІТІНІҢ НАЙБ ИМАМЫ
- Аллаға тапсырамыз. Әрине тас түскен жріне ауыр дейді. Қайғының емі сабыр дейді. Сондықтан отбасындағыларға туған-туыстарына, ата-аналарына қайғырып көңіл айтамыз.
Қауіптің беті қайтты деп ел үйлеріне оралып жатқанда апат ошағында тағы бір жарылыс болды. Бұл түсті сағат он екі жарым шамасы еді. Қою-қара түтін қойманы бұлт боп басып, біршама уақыт қалықтап тұрып қалды. Осыдан соң Қайнар ауылына баратын жол толық жабылып, ішке тек күштік құрылым өкілдері ғана кіргізіліп жатты. Ал министр сонда қауіптің беті әлі қайтқан жоқ, екі қойма түтіндеп тұр, жарылмаған оқ-дәрігелер бар деді.
Бірнеше күннен бері өртті сөндіруге барып, хабарсыз кеткен бауырларын іздеген ел «Батыс Еуропа -Батыс Қытай» тас жолы бойындағы қонақүйдің алдында жиналған. Олар 3 күннен бері ауыл боп атқа қонып, тау-тасты аралап шыққандарын, бірақ іздеуге көмектескен бірде-бір полицейлерді не төтеншеліктерді көрмедік деп базыналарын айтты. Көмекті күте-күте төзімі таусылған жұрт билік тарапынан іздеу жұмыстарына тым болмаса ұшақ қосып, қосымша күш жұмылдыруды талап етті. Ал әскерилер елді сабырға шақырып, іздеу жұмыстарының қалай жүріп жатқаны туралы айтып берді. Туыстарынан жоғалған жігіттердің киімдерін алып, сөздеріне сенбеген елдің бір екеуін салып, оқиға орнына барып қайтты. Бірақ сонда да жарылыс ошағына өздері өтіп кетпек болғандар да кездесіп жатты. Алайда әскерилер қуып жетіп, арты төбелеске ұласты.
Ал кешкі 5 тер кезінде әскери бөлімше жақтан өрт сөндіру және жедел жәрдем көліктері шықты. Құр сөзді естуден қажыған халық жедел жәрдемнің жолын бөгеп, қоршап алды. Кейбірі терезесінен ішке үңіліп, туыстарын іздеді. Бірақ бірде-бірі өз жақындарына ұқсата алмады. Сәл кейін әскери инспекция өкілі де шығып, мән жайды айтып берді.
Әскерилер, мәйіттерді апаттан аман қалған мамандардың айтқан сөзі арқылы тауып жатырмыз деді. Айтуларынша, қазір өз-өзіне келіп, ес жиған жігіттер кімнің қай маңда тұрғанын бәрін айтып берген. Тиісінше, іздеу жұмыстары да сол маңға жұмылдырылады екен. Айта кетейік, қазір 35 адам түрлі жарақаттармен ауруханада жатыр. Олардың төртеуінің жағдайы ауыр. Ал 14 адам қаза тапқан. Әзірге, төрт азаматтың жеке басы анықталып жатыр. Ертең қаза болған азаматтардың туыстарына марапаттар тапсырылмақ.

Видео ЖАРЫЛЫСТАН КЕЙІНГІ ТӨРТІНШІ КҮН. ҚАЙТЫС БОЛҒАНДАР САНЫ ОН ТӨРТКЕ ЖЕТТІ. канала Информбюро 31