АҚЫН ӨТЕЖАН НҰРҒАЛИ – 70 ЖАСТА (2008)

2008 жылғы 14-15 тамыз күндері Ақтөбе облысы Байғанин ауданында ақын, «Құрмет» орденінің иегері Өтежан Нұрғалиұлының 70 жылдық мерейтойы аталып өтті. 17 жасында-ақ «қазақтың Пушкині» деп танылған талант иесі кемеліне келген кемеңгер қалпында туған жерінде ел-жұртымен сағына көрісті.
Аса көрнекті қазақ қаламгері Өтежан Нұрғали 1938 жылдың 15 тамыз күні Жем бойында дүниеге келген. 1964 жылы С.Киров атындағы қазақ мемлекеттік университетін бітірген соң, алғашқы еңбек жолын туған ауылы – Жарқамыс орта мектебінде ұстаздық қызметтен бастайды. Кейін Алматыға келіп, «Жалын» баспасында, қазақ телевизиясында, әдеби газет-журналдарда түрлі қызметтер атқарады.
Оның әр жылдары шыққан төрт кітаптан тұратын «Соғыстың соңғы жазы» атты балладалар топтамасы, «Менің махаббатым», «Ақ нөсер», «Нөсерден кейін», «Кемпірқосақ», «Тыныштық», «Қайыңды тоғай», «Ай астында ақбоз үй», т.б. таңдамалы өлеңдер жинағы мен «Афина мектебі» атты философиялық дастандары қазақ әдебиетінде ерекше орын алады. Сонымен қатар ақынның аударма саласындағы еңбегі де зор. Ол орыс ақындары Пушкин, Есенин, Блоктан бастап, әлем әдебиетінің әйгілі өкілдері – Батыс пен Шығыс шайырларының да шығармаларын ана тілінде сөйлетті.
Қарауылгелді, Жарқамыс, Кемерши ауылдарында өткізілген мерейтойға қаламгердің ақтөбелік М.Ақдәулетұлы, Е.Ашықбаев, маңғыстаулық С.Нұржан бастаған ақын інілері де қатысып, оқырмандармен кездесулерде Өтежан Нұрғали өмірі мен еңбектері жөнінде пікірлерін айтты.
Мерейтой аясында жас палуандар арасында қазақша күрес өткізіліп, жеңімпаз Өтежан Нұрғали атасының атындағы жүлдеге ие болды.
Ақын туған Жарқамыс ауылындағы ескі үйінің қазіргі орнынан бұлақ көзі шығып жатыр. Оны халық сүйікті ұлының құрметіне «Өтежанның бұлағы» атап кеткен.
Байғанин ауданы әкімдігінің ұйымдастыруымен қаламгердің туған жерінде музей-көрме, ауыл мектептерінде ақынның өмірі мен шығармашылығына арналған бұрыштар жасақталған.
Ауыл балалары даңқты жерлесінің жырларын жаттап өсіп келеді.

Видео АҚЫН ӨТЕЖАН НҰРҒАЛИ – 70 ЖАСТА (2008) канала Baktybay ZHAILAU