Көкшетаудағы құрама жем зауыты тәулігіне 150 тонна дайын өнім өндіріп отыр

Көкшетаудағы құрама жем зауыты өз өнімдерінің тең жартысын экспортқа шығарып отыр.

Индустриалды-инновациялық даму бағдарламасы аясында 2014 жылы бой көтерген бірегей кәсіпорын бүгінде тәулігіне 150 тонна дайын өнім өндіруде. Зауыттың негізгі тұтынушылары – мал және құс шаруашылығымен айналысатындар. Әсіресе ет және сүтті бағыттағы шаруа қожалықтары.

Зеренді ауданындағы бұл шаруа қожалығының отандық жемді қолдана бастағанына он күннен енді ғана асыпты. «Бірақ соның өзінде нәтижесі керемет», – дейді мұндағылар. Фермадағы сиырлардың сүті 2 есеге дейін артқан. Шаруашылық басшысы: «Бұл өнімнің ең алдымен отандық болғаны қуантад», – дейді. Себебі қазақстандық өнім импортқа қарағанда түрлі химикаттардан таза.

Лидия Карнашаускене, шаруа қожалығының басшысы

-Мен жақында осы жемнің 1 тоннасын сатып алдым. Міне бүгінге дейінгі 15 күннің ішінде сиырларымыз көз алдымызда сүтті кәдімгідей көп бере бастады. Бұрын мәселен бір сиырдан 10 литр сүт саусақ, қазір сол сиыр 15 литр беріп жүр. Ал алғашқы тумалардың сүті 4 литрден 12 литрге дейін бір-ақ көтерілді.

Ал зауыттың өзі Көкшетау қаласының іргесіндегі Станционный кентінде орналасқан. Қазір мұнда жергілікті 30 адам еңбек етуде. Өндіріс ошағы басшыларының айтуынша, кәсіпорынның аяғына нық тұруына мемлекеттің қосқан үлесі зор. Айталық, құрылысқа жұмсалған 1 млрд 200 миллион теңгенің біраз бөлігін мемлекет қаржыландырыпты. Қазір зауыт өнімдері тек Қазақстанда ғана емес, көрші елдерде де үлкен сұранысқа ие.

Сергей Миленко, құрама жем зауытының директоры

-Мәселен біз қазір 1000 тонна өнім өндірсек, оның 500-600 тоннасын Ресейге жөнелтеміз. Көршіміздің Омбы, Новгород және Түмен облыстары біздің тұрақты клиенттеріміз.

Зауыт басшылығы болашақта шикізатты ұнтақтайтын жаңа желі сатып алуды жоспарлап отыр. Ал іргеде осындай құнарлы құрама жемді өндіретін ірі кәсіпорынның бар екенін білген Лидия, енді қолда бар 200 бас ірі қараға тағы 50 бас сиыр қосып, сүтті бағыттағы мал шаруашылығын одан әрі дамытуды көздейді.

Авторлары: Дамир Берікұлы, Анатолий Полянный

Видео Көкшетаудағы құрама жем зауыты тәулігіне 150 тонна дайын өнім өндіріп отыр канала Khabar Novosti