Мүгедек жандардың жанайқайы депутаттардың шамына тиді

Полицейлер мен әскерилерге берілетін мемлекеттің шарапаты мүгедектерге тимей жатыр. Бүгін үкімет үйіне барған мүмкіндігі шектеулі баласы бар азаматтардың арызы осындай болды. Олар баспана жалдауға немесе сатып алу үшін әскерилер мен тәртіп сақшыларына төленіп жатқан төлемді өздеріне де берілсін деп отыр. Үкімет бұл мәселе бойынша тиісті жобаны қолға алып жатыр екен. Ал, мүмкіндігі шектеулі жандардың заңды талабы депутаттардың шамына тиді.
Құқық қорғаушы Болатбек Біләлов елдің туын сатып, күнкөрісіне ақша жинап жүрген мүмкіндігі шектеулі азаматты көріп, осылай ашынып отыр екен. Ол жалпы елдегі әлеуметтік әлжуаз топтардың шынайы ахуалы осындай дейді. Заңды баспананы талап етіп, біресе әкімдікке, біресе парламентке барғанымен әлі күнге бірде-бір ресми жауап алмапты.
БОЛАТБЕК БІЛӘЛОВ, Құқық қорғаушы:
– Біз үй сұрадық. Біз арендаға үй сұрадық. Енді үй бере алмаса, арендаға үй бере алмаса, онда ақша берсін. Сол ақшаға мына кісілер пәтерлерін жалдап тұру үшін. Неге полицияға, неге әскерилерге сондай ақша беріледі? Ал, мүгедектерге ондай ақша берілмейді?
Мүгедектігі бар бала асырап отырған отбасылардың бұл талабы депутаттардың көңіліне қона қоймады. Олар онсыз да мемлекет көмек көрсетіп жатыр дейді.
КӘРІБАЙ МҰСЫРМАН, ҚР Парламенті Мәжілісінің депутаты:
– Мүгедек балаға да беріліп жатыр, ата-анасына да беріліп жатыр. Полиция мен әскери қызметшінің мәртебесі де бөлек қой.
«Халық қаһарманы», генерал Бақытжан Ертаев тіпті осы мәселені көтерген тілшілерді кінәлады.
БАҚЫТЖАН ЕРТАЕВ, ҚР Парламенті Мәжілісінің депутаты:
– Президентіміз, біздің дәстүріміз де мүгедекті тастаған емес. Сендер жинап-жинап алып келесіңдер де "не істеп жатыр? не істеп жатыр?"! Соны көтергенді жақсы көресіңдер. Көтере бересіңдер, көтере бересіңдер осы сұрақты.
Мәжілісмендер мәселенің байыбына бармағанымен, үкімет өкілдері бұл сұрақ бойынша нақты жобаларды қолға алып жатыр екен. Алдағы уақытта ел аумағында баспана кезегінде тұрған азаматтардың пәтерді жалға алу ақшасының бір бөлігі мемлекет есебінен төленуі мүмкін.
РУСЛАН ТАҒАЕВ, ҚР ИИДМ Құрылыс және тұрғын үй-коммуналдық шаруашылық істері комитетінің бас сарапшысы:
– 80 пайызына дейін. Жалға алатын болса 80 пайызын үкімет субсидиялаумен жауып отыратын болады. Ол жерде 5 жылға дейін. Жалға алатын болса 5 жыл біз оларға мүмкіндік береміз. 5 жыл ақша жинап, өзінің тұрғын-үй жағдайын жақсарту үшін.
Есесіне, баспана кезегі бұрынғыдай санат бойынша бөлінбейді. Яғни, көпбалалы, жалғызбасты деп емес, кезекке тұрған жылы бойынша рет-ретімен үймен қамтымақ.
Бақытнұр Әлібай, Дидар Елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Мүгедек жандардың жанайқайы депутаттардың шамына тиді канала Информбюро 31