Бош прокуратура аралашувидан сўнг бухоролик тадбиркорларга улар сўраган ечим ваъда қилинди

Шаҳар марказидаги “Дилкушо” бозоридаги дўконлари бузилганидан бери ўтган икки йилга яқин вақт давомида идорама-идора юриб ўз норозилигини билдириб келган бухоролик 600 дан ошиқ тадбиркор талаби қисман бўлса-да қондирилди.

Бу ҳақда Озодликка хабар берган тадбиркорларга кўра¸ 10 -14 декабрь кунги норозиликлардан сўнг Бош прокуратура назоратига олинган ўз шикоятларига жавобан вилоят ва шаҳар ҳокими “Дилкушо” бозори ҳудудидан ўзларига алоҳида комплекс қуриб беришни ваъда қилган.

Озодлик Бухоро шаҳар ҳокими ва унинг ўринбосаридан бу ваъда ижросига оид тафсилотларни олишга муваффақ бўла олмади – расмийлар телефон қўнғироқларига жавоб бермади.

Янги ечим¸ янги ваъда

20 декабрь куни Озодлик боғланган бухоролик тадбиркорлар намояндалари ўтган икки ҳафта давомида кетма-кет уюштирилган норозилик тадбирлари ортидан Бухоро вилоят ва шаҳар ҳокими ўз талаблари қондирилишини ваъда қилганини билдирдилар.

“Бухоро шаҳар ҳокими Карим Жамолович мажлис қилиб¸ муаммоларингиз ҳал бўлди. “Дилкушо” ҳудудидан сизлар учун қўшимча комплекс қурилади ва ундан бузилган дўконларингизга бошма-бош жой берилади. Сизлар учун ҳар квадрат метр нархни 5 миллион сўм қилиб белгиладик. Бузилган дўконидан каттароқ жой олмоқчи бўлганлар¸ ошиқча квадратурага 12 миллион сўмдан беради. Тўловнинг 50 фоизини январь¸ қолганини мартгача тўлайсизлар¸ деди. Қўшимча комплекс “Дилкушо” ўрнида қуриб бўлинган уч қаватлик гипермаркетга қўшиладиган бўларкан”¸ деди бухоролик тадбиркорлардан бири.

Видео Бош прокуратура аралашувидан сўнг бухоролик тадбиркорларга улар сўраган ечим ваъда қилинди канала Ozodlik Radiosi