Баткенде акыркы 5 жылдан бери өрүк быйылкыдай гүлдөгөн эмес

Быйыл Баткен облусу боюнча 97 миң тонна өрүк алуу пландалууда, деп билдирет аймактык кабарчы.
Дыйкандардын айтымында, акыркы 5 жылдан бери өрүк мындай гүлдөгөн эмес. Айрым жылдары өрүктү үшүк алса, кээде ысыктан өрүк гүлүн төгүп салган.
«Быйыл Баткенде өрүк башкача бир бажырайып гүлдөдү. Буюрса, Жараткан быйыл Баткен жергесине жакшылыгын, молчулугун, бактылуулугун берет. Буга чейин өрүк гүлүнүн мынчалык аңкыган жыпар жытын, ушунчалык суктанарлык гүлдөшүн байкай бербепмин. Акыркы 5 жыл аралыгында табияттын өзгөрүүсү менен өрүктөр жакшы гүлдөбөй, ысык-суукка алдырып, түшүм да жакшы болбой келген.
Кыш мезгили да жылуу келип, өрүк дарактары кышкы уйкуга толук кирбей, жазында жакшы гүлдөй албай калган. Мына быйыл кыш кыштыгын кылды, өрүк дарактары сонун эс алды, жыйынтыгында укмуштуудай гүлүн ачты. Эми мөмө ысык-сууктан сактанып байлап алса, өрүк түшүмү да жакшы болот эле», - дейт «Алыш Дан» кооперативинин жетекчиси Турсунали Төлөмүшев.

https://batken.turmush.kg/ky/news:506402

Видео Баткенде акыркы 5 жылдан бери өрүк быйылкыдай гүлдөгөн эмес канала Turmush