Ўзбек келинлар ноласи: чегарада хор бўлдик, Ўзбекистон бизни киритсин!

#bbcuzbek

Ўзбекистонга келин бўлиб тушганига 20 йилдан ошган бўлса ҳам бу давлат фуқаролигини ололмаган Қирғизистонлик келинлар ҳар икки ойда чегарадан ўтиб, паспортларига “кирди-чиқди” муҳрини бостиришга мажбур бўлади.

Улар учун коронавирус ортидан эълон қилинган карантин ҳам қўшимча муаммоларни пайдо қилган.

Дунё бўйлаб кенг тарқалаётган коронавирус сабаб, март ойининг ўрталарида Ўрта Осиё давлатлари, жумладан Қирғизистон билан Ўзбекистон чегаралари ҳам ёпилган.

Чегаралар ёпилар экан, икки давлат ҳудудларида қолиб кетган ватандошлар ўз юртларига қайтишни истайди. Улар у ёки бу сабаб ҳамон чегарадан ўтаолмаяпти.

Ўш шаҳри яқинидаги “Дўстлик” чегарасида йигирмага яқин аёллар Ўзбекистонга ўтиш илинжида бир неча кундан бери турганини айтади.

Мубассар опа Ўш вилоятининг Қорасув шаҳридан Андижоннинг Қўрғонтепа туманига сал кам 30 йил аввал келин бўлиб тушган, бироқ хануз Ўзбекистон фуқаролигини ололмаган. У 16 мартда Ўшга келган, аммо шу куни чегаралар ёпилиши ортидан Ўзбекистонга қайта олмаган. 4-5 кундан бери “Дўстлик” чегараси яқинида тунамоқда.

“Ўшга 16 март куни келганман, шу бўйича карантин деб Ўзбекистонга ўтказмаяпти. Бола чақаларимиз, уйларимизни соғиндик.

Ўзбекистонга қўнғироқ қилсак, Қирғизистонга қўнғироқ қилинглар дейди, бу ерга қилсак, ўзинглар ҳал қилинглар дейди. Тўрт кундан бери сарсон бўлиб чегарада ўтирибмиз. Сизлардан илтимос, бизларни Ўзбекистонга ўтказиб юборинглар”, дея йиғлайди 56 ёшли Мубассар Каримова.
Онахоннинг сўзларига кўра, чегара яқинида ўтирган аёллардан ҳеч ким хабар олмаган. Улар аввалига чегара яқинидаги уйларда ҳақ тўлаб тунашган.

Бор пулларини ҳам сарфлаб бўлгандан кейин, энди қаровсиз бинода тунашга мажбур бўлмоқда.

“Бизни айбимиз Қирғизистон фуқароси бўлганимизми? Шунчалар хормизми? Жуда хор бўлиб кетдик” - дея ҳўрсинади онахон.

BBC News O'zbek - BBC News O'zbek tilida, onlayn, TV va ijtimoiy tarmoqlarda

Видео Ўзбек келинлар ноласи: чегарада хор бўлдик, Ўзбекистон бизни киритсин! канала BBC Uzbek