Şəhəri bir birinə qatan avtoxuliqanın həbsdən görüntüləri

YPX.AZ xəbər verir ki, Nəsimi rayon sakini, 1994-cü il təvəllüdlü Yusifli Şəhram Şakir oğlu 15 aprel 2020-ci il saat 16:50 radələrində idarə etdiyi 90 PG 475 dövlət qeydiyyat nişanlı “Daewoo” markalı avtomobilin sürücüsü Dilarə Qədirbəyova küçəsindən başlayaraq Bakı şəhərinin bir çox mərkəzi küçələrinda olduqca kobud və təhlükəli qayda pozuntuları edərək digər hərəkət iştirakçılarının hərəkətinə mane yaratmış, avtoxuliqanlıq hərəkətləri nümaiş etdirmiş, aralarında YPX avtomobili də olmaqla beş nəqliyyat vasitəsinə ziyan yetirmişdir.
Belə ki, polis əməkdaşlarının saxla əmrinə tabe olmayan sürücünü, Bakı şəhər Dövlət Yol Polisi İdarəsinin 10-cu tağımının 99 YP 485 dövlət qeydiyyat nişanlı patrul avtomobilində xidmət aparan polis serjantı Məlikov Elvin Elman oğlu və polis baş serjantı Kəngərli Xəyyam Teyyub oğlu saxlamağa müvəffəq olublar.
Sürücü barəsində yol polisi tərəfindən toplanmış materiallar aidiyyəti üzrə məhkəməyə təqdim olunub. Məhkəmənin qərarı ilə Yusifli Şəhram barəsində bir il sürücülük hüququndan məhrum edilməklə 30 gün müddətində inzibati həbs tədbiri seçilib.
YPX.AZ komandası, Bakı şəhər Baş Yol Polisi İdarəsinin bölmə rəisi Vaqif Əsədovla birlikdə Azərbaycan Respublikası Daxili İşlər Nazirliyi İnzibati Həbs Olunanların Saxlanılma Mərkəzinə gedərək məsələ ilə bağlı Yusifli Şəhram ilə görüşüblər. Polkovnik Vaqif Əsədovun və müxbirimizin suallarını cavablandıran sürücü, tutduğu əməldən peşman olduğunu bildirərək, heç kimin bu formada davranmamalı olduğunu da bildirib.
Qeyd edək ki, sürücünün bir həftədən artıq müddətdir ki, yaşadığı evə getmədiyi və ailəsi ilə əlaqə saxlamadığı üçün, ondan narahat olan ailə üzvləri Daxili İşlər Nazirliyinin 102 qaynar xətti ilə əlaqə saxlayaraq Y. Şəhramın itkin düşməsi haqqında məlumat veriblər.
Təqdim etdiyimiz görüntülər və bu sujet bir çox gənclərimizə örnək olmalı və olduqca təhlükəli bir maraq olan avtoxuliqanlıqdan uzaq durmağa sövq etməlidir. Bu əməllərin nəticəsində bir neçə avtomobillə ziyan dəyməsindən əlavə insan həyatına da xəsarət yetirilə bilərdi. Gənclərimiz bunu düşünməli və nə qədər təhlükəli bir işə maraq göstərdiklərini anlamalıdırlar.

Видео Şəhəri bir birinə qatan avtoxuliqanın həbsdən görüntüləri канала PATRUL TV