Подвалда тамақ ішіеміз | Боранда жұмыс істейміз | Бала кезден жұмысқа жегілдік | ЕҢБЕК АДАМЫ #3

#НартайАралбайұлы #NartayNews #НартайНьюс #nartaynews #Еңбекадамы

🔹Спикер: Өміртай Ешниязов - "Таза Өскемен" коммуналдық кәсіпорынының мастері.

Биыл Шығыста қар қалың түсті. Марқаөл ауданындағы бірнеше ауыл қар астында қалып, байланыс үзілгенін естіп, көрген боларсыз. Тіпті, шалғайда шарасыз қалған тұрғындарды тікұшақпен құтқаруға тура келді. Шығыстың табиғаты биыл ғана емес, жылда осындай мінез танытады. Енді сондай мөлшерде қалың қар қалаға жауғанда не болады? Әлбетте, қозғалыс қиындап, тұтас шаһардың тіршілігі баяулайды. Бүкіл техниканың бәрі сайдың серке тасындай тізілулі тұрған Астананың өзінде қар жауғанда темір тұлпарлар тұсауға салынғандай, кептелісте кісінеп қалмай ма?! Ал, сондай жағдайға тап болған шағын шаһарлардағы ахуалды бағамдай беріңіз. Бірақ, табиғат қандай мінез танытса да, бет тілетін аяз сақылдап, бет қаратпас боран тұрып, нөсер жаңбыр мен түйені шайқайтындай дауыл соқса да, қара қарғаның миы қайнайтындай аптап ыстық болса да, таң алагеуімнен жұмысқа шығып, сол құбылған ауа райының бұзып кеткен жерлерін тап-тұйнақтай етіп, маңдай терімен сүртетін мамандық иелері бар. Орамы бөлек Оралхандай айтсақ, «бұл жақта қыс ұзақ». Әңгіменің ауанын ауа райынан тарқатқанымнан-ақ, байқаған боларсыз, бүгін біз нағыз еңбекті талап ететін мамандық иелері жайлы, нақтырақ коммуналдық кәсіпорынының мастері, өскемендік Өміртай Ешниязовпен таныстырамыз.

Мысалға, түнде қар жауды делік. Ал, қаладағы күйбең тірлік таң белдеуінен атып келе жатқанда шамамен сағат 7-лерде басталады. Коммуналдық кәсіпорынның жұмысшылары соған дейін қаланың біраз жерін, көшелерін тазартып үлгеруі керек. Сондықтан, олардың жұмысы түнде де тоқтамайды. Техника қанша дамып жатса да, қуыс-қуысты, ой-шұңқырды тазарта алмайды. Бәрібір адам күші керек. Сосын қаладағы қарды күреп жүргеннің бәрі білекті, қарулы жас жігіттер емес. Олардың арасында егделік тарқан ағаларымыз да, аяулы аналарымыз да жүр. Егер таңертең далаға шығып, маңайдың бәрі айнадай болып тұрса, біле жүріңіз сол таза көшелерде маңдай тердің табы бар.

Бүгінгі кейіпкеріміз Өміртайдың мамандығына жастар жаппай қызығады деп айта алмаймыз. Асып-тасып жатқан жалақы да жоқ. Керісінше, жауапкершілік, қиындық басым. Бірақ, сол жұмысты Өміртай өмірлік мамандығы ретінде таңдап, адал және абыроймен атқарып келеді.Ешкімге өкпелеп, міндетсініп те жатқан жоқ. Ол үшін ең бастысы еткен еңбегі елдің кәдесіне жараса игі. Хош, қазір екінің бірі өнер адамы болып, жұлдыз қаптаған заман. Арзан әзіл айтып, бейпіл сөзге сірескен рөлді сомдап, не мән, не талғамы жоқ ән шырқап, бәрі шетінен әртіс болған заман. Солар сахна мен назардан түспей, солар үлде мен бүлдеге оранып жатыр. Соларды көрген жастар, әлбетте, ауырдың үстімен, жеңілдің астымен жүргісі келеді. Әрине, әркімнің өз жолы бар, айыптаудан аулақпыз. Бірақ, біз бүгінгі күннің батырларын шатастырмау керекпіз. Ал, бүгінгі күннің батырлары бүгінгі кейіпкеріміз сияқты еңбек адамдары. Оларға аста-төк сый көрсетіп, мараптап берудің қажет жоқ. Кейде қоршаған ортаны, өзіңіздің аулаңызды таза ұстасаңыз соның өзі көрсетілген құрмет.

“Еңбек адамы" елеусіз қалмасын! Биыл біз тұтас фильмдер сериясын жасауға бел будық. Басты қолдаушымыз AMANAT партиясы. Кейіпкерлеріміз қарапайым қызметкерлер, бірақ үлкен жүректі, еңбекқор, өмірге құштар адал адамдар. Бұған дейін экрандардан тек өнерпаздар мен шенеуніктерді көретін едік. Бұл дұрыс болмады, олқылықтың орнын толтыру керек. Біз соны мойнымызға алдық. Бұйыртса 40 фильм жарыққа шығады. Көріңіздер!

Интаграм: https://instagram.com/nartay_aralbayuli?igshid=vrytdav3x4e3
Фейсбук: https://www.facebook.com/nartai.sarsengaliyev

Видео Подвалда тамақ ішіеміз | Боранда жұмыс істейміз | Бала кезден жұмысқа жегілдік | ЕҢБЕК АДАМЫ #3 канала Nartay Aralbayuli