Logko Keypul

Feley pu peñi, pu lamgen. Petu iñ konnun tañi gütxam mew, iñche kiñe marimari pian taiñ pu logko, machi, pu werken, pu txaftu mollfün müleyepalu tüfa mew. Marimari pu peñi, marimari pu lamgen.
[¡marimari!]

Iñche tañi üy Victor Queipul Waikil pigen. Temukuykuy pigey tañi lof; feychi lof mu ta küpan, pu peñi, pu lamgen. Feygey llemay taiñ mapuche gen. Fey ta küzawküleiñ. Feypifeypiwkeiñ ta “kintutuaiñ taiñ rüpü, mületupe ta yamuwün mapuche” pikeyiñ.

Re witxapalan llemay ta tüfa mew pu peñi pu lamgen. Fawpüle pigen mew ga iñche, feymu ga witxapan. Felepan nentunietuyepan ga ñi gütxam ga tüfa mew.

Feygey llemay tañi rupaleken mu ta fenten zugu mu[?] ta üyew, welu newentuleaiñ. Amulepe taiñ weychan. Witxa txipape ta kümeke kona, pipigekeiñ taiñ wew mew, pu peñi, pu lamgen.

Llikalayayiñ. Iñchiñ ta mapuche geyiñ. Nieyiñ ta newen, nieyiñ ta günen. Tüfachi pu wezache wigka chumte kizu egün rume, apolpule mapu üyew, welu fey iñchiñ ga iñ mapuchegen nieyiñ taiñ günen. Feychi günen mapuche wiñokintutuliyiñ. Wiño witxametuliyiñ, tüfa egün ta chumlayay egu[?]. Chumgechi rupale antü chumgechi rupale ga txipantu, zoy choyüchoyügeay taiñ pu wecheke kona pu weychafe, pu kona, pu werken, pu peñi, pu lamgen.

Amuleay taiñ newentun, güyulayay tamün logko, pu peñi, pu lamgen. Fey mületuaiñ iñchiñ felepaiñ ga tüfa mew. Feygey llemay tañi afkentu rupaken mu ta zugu üyew, Temukuykuy tati üyew. Welu Temukuykuy tuntelu chelekelay, Temukuykuy tunte weychalekelay. Itxofil lelfün mapu mew, petu ga witxa txipay ga pu werken, pu lof, pu wecheke kona, pu weychafe newentualu.

Feymew llemay taiñ che fentemu faletuy llemay che, matu logko gen piafun llemay, welu femgechi ga iñ tuetew mew. Feymu pu logko getun fewla. Nentunentuyepatulan gütxam[?] tüfa müleay pu peñi, pu lamgen. Feymew kelluwayiñ, zew gillatuñpeiñ. Llellipupefiyiñ ga günechen. Elumuayiñ ga newen. Txekayayiñ. Pewfaluwaiñ, welu kiñe newen mew. Pewfaluwaiñ pipigen pu peñi pu lamgen. Amulepe taiñ newentun. [...*]

Pu peñi pu lamgen, iñche wüneltun fewla . Niewewawiñ* ta kiñe mañumün ka pu peñi eymün ta fawpüle küpan mew, tami witxalepan mew ta tüfa mew, ka tamün allkütupapefiel ta iñchiñ tati. Iñche ta wiya epu ragipun txipapaiñ. Welu kiñe ayekan, kiñe wiyülrakizuam, kiñe müllmüll* ellkan rakizuam ta küpalaiñ. Kiñe newentun, kiñe amuleal kintutual taiñ iñchiñ taiñ kizu rüpü. Feychi zugu mu ta witxalepaiñ ta tüfa mu, pu peñi pu lamgen. Feypian pewmagele tüfachi pu kom pu peñi mülepalu tüfa mew, waria tuwulu tati, kizu egün taiñ günew mew ta akulaygün tüfa mew. Muñtukañmagetuayiñ mapu egün, feymu ta felepatuymün. Welu rakizuamaymün pu peñi pu lamgen wiñotutuay tamün tuwün, eymün ta niemün ta küpalme. Nieymün ta tuwün. Chi nieymün ta chew ta folilu waymün, pu peñi pu lamgen. “Amulepe weychan” pituan tüfa mew pu peñi pu lamgen.

Видео Logko Keypul канала fiestoforo