«Баспана хит», «7-20-25» үй бағдарламасының жабылатынын уайымдаған жұрт банктерге ағылып жатыр

Биыл «Баспана хит», келер жылы «7-20-25» тұрғын үй бағдарламасының жабылатынын уайымдаған ел қазірден бастап банктерге асығып жатыр. Себебі жұртты осы қос бағдарламаға қарастырылған лимит сомасы аяқталса не болады деген сұрақ алаңдатып отыр. Ал құрылысшылар одағы болса, мердігер компаниялар арасында бәскелестік артып, баспана бағасы 5-10 пайызға түсуі мүмкін деп болжайды.
Қос бағдарлама бірінен соң бірі жабылады дегенді естіп, дереу банктен ипотекаға үй алып қалуды көздеген алматылық Ләйла Дәнекеева, бүгін таң атысымен қажетті құжаттарын өткізуге асығыпты. «Баспана хит» нарықтағы кез-келген үйді таңдауыма мүмкіндік беретін бірден-бір бағдарлама деп отыр ол.
ЛӘЙЛА ДӘНЕКЕЕВА, Алматы қаласының тұрғыны:
– Сол бағдарламалар жабылады деген соң, жүгіріп келіп кеңес алайын деп келгенмін. Өйткені ол енді бір жағынан халыққа тиімді. Қолдағы бар 20 пайыз ақшаны беріп үй алғанға.
Мемлекеттік әрі екінші деңгейлі банктер арқылы жүзеге асырылатын бас-аяғы 10 шақты бағдарлама аясында клиенттерге нұсқау беретін ипотекалық компанияға келушілердің басым бөлігі дәл осы «Баспана хиттен» бөлек, «7-20-25»-ке өтінім беруге асығады.
НҰРҒАЗЫ АЛПЫСБЕКҰЛЫ, «IPOTEKA GROUP» компаниясы директорының орынбасары:
– Қазіргі таңда Қазақстан бойынша бізге 100-ден астам адам келіп жатыр. Оның 70 пайызы осы екі бағдарламаны таңдайды. Өзімнің болжамым бойынша күзге қарай осы екі бағдарлама бойынша сұраныс артады деген үміттемін.
«Баспана хитке» бөлінген 600 миллиард теңгенің осы уақытқа дейін 500 миллиарды игеріліпті. Сарапшылар, қалған сома жыл соңына дейін таусылады деп отыр. Бірақ, екінші деңгейлі банктер аты басқа, заты бір өзге ипотекалық өнімді клиенттерге ұсынуды қазірден пысықтап жатыр екен.
АЙБАР ОЛЖАЕВ, «Қазақстанның орнықтылық қоры» АҚ сыртқы байланыс қызметінің бас менеджері:
– «Баспана хит» бағдарламасымен белсенді түрде ипотека берген банктер осы бағдарламаға ұқсас өздерінің ипотекалық бағдарламасын әзірлеп жатыр. Ажиотаж жасаудың да қажеті жоқ. Өйткені, ажиотаж туындаса нарықта баға өсуіне, қисынсыз дүниелерге алып келеді. 7-20-25 қалады ғой әлі нарықта. Ол әлі жабылмайды. Оның 1 триллион теңгесінің 325 миллиард ғана игерілді. Қалған 675 миллиарды игерілгенге біршама уақыт керек.
Сұраныстың күзде күрт артатынын Құрылысшылар одағы да болжап отыр. Бірақ, онсыз да жарты жылда 20 пайызға қымбаттаған жаңа тұрғын үй бағасын одан әрі қымбаттатсақ, халықтың қалтасы көтермейтінін жақсы түсініп отырмыз дейді. Мердігер компаниялар арасында күзге қарай өзара бәсеке туып, компаниялар баспана бағасын 5-10 пайызға түсіруі мүмкін екенін жоққа шығармайды. Көз ілеспес жылдамдықпен өсіп жатқан құрылыс материалдарының бағасына тікелей Үкіметтің араласуын сұрап отыр.
ЕРАЛЫ САУРАНБАЕВ, Қазақстанның құрылысшылар одағының басқарма төрағасы:
– Ресей билігінің шешімі бойынша, ішкі нарықтағы мердігерлерге арматура 20 пайызға дейін төмендетілген бағамен беріледі. Біз былтыр Ресейден арматураның тоннасын 180 мың теңгеден алсақ, қазір көтерме бағаның өзі 430 мың. Біз құрылысшылар одағы биліктен тікелей құрылыс материалдарының бағасын реттеуді сұраймыз. Өзіміздегі металлургиялық базаны жандандырсақ та жетіп-артылады.
Осы уақытқа дейін 84 мың адамға үйлі болуға мүмкіндік берген қос бағдарламаның орнына қандай әлеуметтік өнім іске қосылса да, құрылыс материалдарының құны тұрақтамайынша, баспана бағасы түспейтінін одақ өкілдері ескертіп отыр. Тіпті, халыққа қолжетімді эконом кластағы үйді салуға мердігер мекемелер арасында талас болмайтынын айтады.
Әйгерім Ердәулет, Думан Сүйлейменов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#БаспанаХит #үй_бағдарламасы #баспана #ОтбасыБанк

Видео «Баспана хит», «7-20-25» үй бағдарламасының жабылатынын уайымдаған жұрт банктерге ағылып жатыр канала Информбюро 31