ШИКОРИ ХЕШУ ТАБОРИ “ПЕШВО” САР ШУД

Президенти Қазоқистон Қосим-Жомарт Тоқаев рӯзи 17 январ Самат Абиш, бародарзодаи президенти қаблӣ Нурсултон Назарбоевро аз мақоми муовини аввали раиси Кумитаи амнияти миллии ин ҷумҳурӣ барканор кард. Самат Абиш писари бародари калонии Назарбоев буда, чашму гӯши ӯ дар Кумитаи амнияти миллӣ ва дигар ниҳодҳои қудратӣ ба шумор мерафт ва аз номи Елбаси кори ин ниҳодҳоро назорат мекард. Кумитаи амнияти миллии Қазоқистон ахиран сарусадоҳо дар бораи барканории Самат Абишро рад карда, расман хабар дода буд, ки ӯ дар рухсатӣ қарор дорад. Барканории Самат Абиш дар ҳолест, ки дар паи эътирозҳои ахири Қазоқистон яке аз ёрони наздики Назарбоев Карим Масимов, ки раиси Кумитаи амнияти миллӣ буд, ҳамроҳи ду муовинаш бо иттиҳоми хиёнат ба давлат ва кӯшиши ғасби ҳукумат ба ҳабс гирифта шудааст.
Рӯзи 17 январ Тимур Қулибоев, домади аз ҳама сарватманд ва пурнуфузи Назарбоев низ аз мақоми раҳбари Палатаи миллии соҳибкорони Қазоқистон «Атамекен» истеъфо дод. Тимур Қулибоев – шавҳари Динора, духтари дуюми Назарбоев буда, дар гузашта роҳбарии умури чанд корхонаи бузурги ин кишвар, аз ҷумла ширкати роҳи оҳан, “Қазмунайгаз” ва “Самрук-Энерго” –ро дар даст дошт. Ба ҳисоби маҷаллаи «Форбс», Қулибоев 3,1 миллиард доллар ва ҳамсараш Динора низ беш аз 3 миллиард дороӣ доранд ва ин оила яке аз сарватмандтарин хонаводаҳо дар Қазоқистон ба шумор меравад.
Тавре қаблан хабар додем, рӯзи 14 январ Димаш Досанов ва Кайрат Шарипбаев – ду домоди дигари Назарбоевро дар як рӯз аз раҳбари ду ширкати бузурги соҳаи нафту гази ин кишвар – “Қазоқгаз” ва “ҚазТрансОйл” – барканор карданд. Худи Назарбоев аз 28 декабр ба ин тараф дар мазҳари ом ягон бор зоҳир нашудааст.

Видео ШИКОРИ ХЕШУ ТАБОРИ “ПЕШВО” САР ШУД канала Bomdod TV