Ոստիկանությունը բերման է ենթարկել նաև Նորաշենի համայնքապետի պաշտոնակատարին

Նորաշենցիները Արարատի մարզպետարան եկան երեխաների ձեռքը բռնած: Նրանցից մի մասը փակ հանդիպում ունեցան Գարիկ Սարգսյանի հետ, որի ժամանակ պահանջեցին վերականգնել Նորաշենի նախկին համայնքապետի լիազորությունները: Այս ակցիային չէր մասնակցում Նորայր Գրիգորյանը, որի համար նորաշենցիները հասել էին Արարատի մարզպետարան: Փակ քննարկումներից հետո մարզպետն ու նորաշենցիիները ընդհանուր հայտարարի չեկան:

Նախկին համայնքապետի աջակիցները որոշեցին մնալ մարզպետի ընդունարանում և սպասել այնքան ժամանակ, մինչև իրենց սրտով որոշում կլինի: Նույն այդ ժամանակ, մարզպետարանի դրսում հավաքվել էին նորաշենի նորընտիր համայնքապետի ժամանակավոր պաշտոնակատարը և նրա աջակիցները: Նրանք դեմ են, որ նախկին համայնքապետի աջակիցները բողոքի ակցիաներ են իրականացնում:

Դրսում հավաքված էին նաև քաղաքացիներ, որոնք դեմ էին նորանշանակ համայնքապետին: Հենց մարզպետարանի դիմաց գյուղացիները սկսեցին վիրավորել ու հարվածել միմյանց: Միջադեպին Խառնվեց ոստիկանությունը:

Դրսում սպասողները հետո որոշեցին ներս մտնել, հանդիպել մարզպետի և նրա դեմ ակցիա իրականացնողների հետ: Ոստիկանները համայնքապետին և նրա աջակիցներին թույլ չտվեցին մտնել մարզպետարան և սկսվեց հրմշտոց:

Իրավիճակն այնքան թեժացավ, որ ոստիկանությունը հասարակական կարգը խախտելու համար բերման ենթարկեց 5 քաղաքացու : Բերման ենթարկվեց նաև Նորաշենի համայնքապետի պաշտոնատար Արտակ Հարությունյանը: Նրանց ոստիկանության բաժին տարան պատահական մեքենաներով:

Երբ դրսում իրավիճակը հանդարտվեց, մարզպետարանի շենքում նախկին համայնքապետի շահերը պաշտպանողները որոշեցին նստացույց անել: Գրեթե 5 ժամ իր աշխատասենյակում մնալուց և խորհրդակցելուց հետո Արարատի մարզպետը Գարիկ Սարգսյանը դուրս եկավ աշխատասենյակից:

Գարիկ Սարգսյանը չպատասխանեց նորաշենցիների հարցերին, և արագ՝ ոստիկանների ուղեկցությամբ, հեռացավ մարզպետարանի շենքից:

Видео Ոստիկանությունը բերման է ենթարկել նաև Նորաշենի համայնքապետի պաշտոնակատարին канала ArmeniaTV News