JITNEĦĦEW MILL-PROVI TA’ KAŻ XHUD U REFERENZI

ONE.COM.MT • Aħbarijiet mill-awli tal-Qorti.

KITBA: ANDREW SPITERI
FILMAT: ARKIVJI

Xhud u referenzi għall-‘Gabaj’ tneħħew mill-provi fil-kawża kontra Deniro Magri ta’ tlieta u tletin sena, li jinsab mixlija b’sitt kapi t’akkuża, fosthom li qatel lil Sylvester Farrugia fil-Marsa fi Frar tal-2017. Farrugia kien instab mejjet f’għadira demm.

Il-Qorti, ippreseduta mill-Imħallef Consuelo Scerri Herrera, semgħet kif proprju dakinhar tal-omiċidju, l-akkużat kien qiegħed jilgħab il-playstation fid-dar tiegħu fil-Marsa, meta mill-kameras tas-sigurtà lemaħ żewġ persuni mal-bieb ta’ barra u spiċċa jispara fuqhom.

Magri jinsab mixli li hu sparalhom meta diġà kienu tbegħdu mill-faċċata, bil-vittma jintlaqat f’daharu.

Fis-seduta tal-lum, l-akkużat ressaq diversi eċċezzjonijiet dwar l-akkużi li qed jiffaċċja u, wara li semgħet is-sottomissjonijiet kollha, il-Qorti laqgħet l-eċċezzjoni dwar il-piena, it-talba dwar l-inamissibilità tax-xhieda u l-eċċezzjoni biex titneħħa mill-provi kull referenza għall-persuna bil-laqam tal-‘Gabaj’.

IMWISSI JIBDEL ĦAJTU WARA DIVERSI AKKUŻI

Żgħażugħ ta’ 21 sena miż-Żurrieq ingħata twissija mill-Maġistrat wara li kien akkużat li, aktar kmieni dan ix-xahar, daħal u seraq mid-dar t’ommu stess.

Il-Maġistrat Yana Micallef Stafrace wissiet liż-żagħżugħ li kien qed “jaħli ħajtu”, minkejja li diversi persuni pprovaw jgħinuh jagħmel l-għażliet it-tajba.

Il-Qorti semgħet kif Luke Cremona, kellu diversi każi l-Qorti, fosthom li fid-19 ta’ Ġunju li għadda daħal u għamel ħsara fil-proprjetà t’ommu f’Birżebbuġa waqt li din ma kinitx id-dar, waqt li kien hemm ordni imposta ta’ protezzjoni favur ommu.

Minbarra hekk, hu allegatament seraq xi oġġetti mill-proprjetà, kif ukoll waqt sessjoni mal-uffiċjal tal-probation l-għada, Cremona ttieħed l-għassa fil-karozza tal-uffiċjal, iżda spiċċa ħareġ lill-uffiċjal mill-karozza u telaq biha.

Cremona kien arrestat wara tfittxija tlett ijiem wara, fejn sadanittant ukoll naqas milli jattendi seduta tal-Qorti dwar każ separat.

Cremona wieġeb mhux ħati tal-akkużi kollha miġjuba kontrih. Għalkemm ma saret l-ebda talba għall-ħelsien mill-arrest, l-Avukata Francesca Zarb għall-akkużat talbet li jingħata terapija biex jindirizza l-aġir problematiku tiegħu.

Waqt li ordnat li jinżamm arrestat, il-Maġistrat Micallef Stafrace wissietu li hu kellu jkun il-futur ta’ dan il-pajjiż, u mhux il-problema.

Видео JITNEĦĦEW MILL-PROVI TA’ KAŻ XHUD U REFERENZI канала ONE News Malta