Дзырддаг систы

«Æнаддзинад, æнахъинон æмæ æнæпрофессионалон кафт». Ацы эпитеттæй схорзæхджын кодтой Адæмты хæлардзинады ордены номхæссæг Паддзахадон Академион ансамбль «Алан»-ы минæвæртты. Адæм сæ маст ракалдтой социалон хызæгты. Фыццаджыдæр сæ ахастдзинад равдыстой хъазæн хуызы æвæрд миниатюрæмæ нæ республикæйы культурæйы хъуыстгонд кусджытæ.

«Фыццаг банхъæлдтон, цыма Амыраны концертæй скъуыддзагмæ кæсын, афтæ», - Фыссы социалон хызæджы Цæгат Ирыстоны адæмон артисткæ Хадыхъаты Аллæ. Уырнгæ дæр мæ нæ бакодта! Аивад нæ, фæлæ æбуалгъдзинад. Адæмты хæлардзинады паддзахадон ордены ансамблæй хъазæнхъул сарæзтой.

Уӕрӕсейы сгуыхт артист Плиты Нодары дæр кафт дисы бафтыдта. Йæ ныхæстæм гæсгæ, хуыздæр уаид, се `ргом, кæдæм хъæуы, уырдæм куы аздахиккой, уæд. Ома национ кæфтыты хæрхъæддзинадмæ. Ахæм репертуаримæ, дам, ансамблы фидæн тæхудиаг нæу.

- Æрцæрын нæ кодтой сæ «ламбадæйæ»! Сæхиуыл кæм нæ кусой, уым цавæр фидæн хъуамæ уа. Сæ профессионалон æмвæзад заууатмæ æрцыд. Цæугæ дæр сæм нæ кæнын. Нымад та дзы дæн аивадон разамонæджы ассистентæй. Уæвгæ мæн фæрсгæ дæр ничи кæны æмæ дзы æвæрынц алыхуызон ламбадæтæ.

Карз ныхæстæй Фейсбукы аивадон къорд ныссæста режиссер Хъæрджынты Изабеллæ дæр. Кафт схуыдта æнæуагдзинад æмæ æгъдаухæлд.

- Мызд æмæ паддзахадон ном райсынмæ сæ алчидæр сæрæн куы у, авд хохы сæрты дæр ахиздзысты. Хъуыддаг аивадмæ куы `рцæуы, уæд уымæ та кæсынц куыдфæндыйы цæстæй. Адæмон, академион къордæй хынджылæггаг сарæзтой. «Амыран»-имæ дæр сæ абарæн нæй, уымæн æмæ уым кусынц зæрдæргъæвдæй.

Цы федта уымæй разыйæ нæ баззад хореограф Кокайты Алан дæр.

Сойджын эпитеттæ чи нæ бавгъау кодта, ахæмтæ чысыл нæ разынд. Чи йæ нæма, уый йæ æнцонтæй рацагурдзæн интернеты. Кафты фæстæ чи æмдзæгъд кодта, чи та йæ хæдахуыр къорды архайдимæ абарста. Уæвгæ, се ппæт иу хъуыдыйыл хæст не сты. Репертуарон ногдзинады фарс чи рахæцыд уыдон кæд стæмтæ сты, уæд сæм ис сæхи цæстæнгас. Сæ иу - кæй зæгъын æй хъæуы, ансамблы аивадон разамонæг Тедеты Руслан. Кафт сæвæрынмæ йæ цы сразæнгард кодта, зæгъгæ, йæ бафарстам.

Адæмон кæфтыты паддзахадон академион ансамбль «Алан» Ирыстоны кад дунейыл раджы айхъуысын кодта. Номдзыд къордæн 1938-æм азы бындурæвæрæг уыдис Кокойты Тæтæрхъан. Уæд уал фылдæр заргæ кодтой. Кафты ансамбль ссис 1966-æм азы, 2 азы фæстæ йæ сæргъы `рлæууыд Уарзиаты Хадзысмел. Уæд къордæн радтой йæ абоны ном дæр. Æнæмæнг, йæ фырт Уарзиаты Сосланмæ дæр ног кафты тыххæй хабар байхъуыст. Йæ ныхас карз ахастимæ уы

Йæ равзæрдæй абоны онг ансамбль гастрольты зæххы къорийы цы ран нæ басгæрста, ахæм нал баззад. Æнцондæр, æвæццæгæн, кæдæм нæма фæхæццæ, уый зæгъæн у. Кафджыты схорзæхджын кодтой бирæ æппæтдунеон фестивальты майдантæй, у Хетæгкаты Къостайы номыл премийы лауреат, æппæтуæрæсеон æмæ дунеон конкурсты уæлахиздзау. Æвæццæгæн, сæ ног фæлварæн дæр уымæн бынтон нæ фæрæстмæ адæмы цæсты.

Торчынты Бексолтан, Карсанаты Галинæ, Плиты Нодар, Байаты Альбинæ, Калоты Земфирæ, Туаты Ирбег æмæ ма бирæ `ндæртæ... Уыдон ирыстойнаг къордæн дунейы скодтой стыр ном. Ныртæккæ къорды ис 74 адæймаджы. Фæлтæрдджын артисттæ æмæ æрыгон кафджытæ. Сæ алы фезмæлдмæ дæр сын цæсты гагуыйау кæсынц канд сæ концертуарзджытæ нæ, фæлæ аивады куырдадзы сæ фарсмæ чи ис, уыдон дæр. «Алан»-ы репертуар хъæздыг æмæ зæрдæмæдзæугæ у. Ис дзы 35 кафтæй фылдæр.

Ламбадæйæ хъазæн хуызы фæнд кодтой сылгоймæгты зæрдæтæ балхæнын сæ бæрæгбоны. Кæд сын бынтон нæ рауад, уæддæр фаг æфхæрд баййæфтой. Чи зоны, куыд артисттæ, афтæ фаухæсджытæ дæр сæхицæн скæной аккаг хатдзæгтæ. Йæ куыст адæмы цæст кæмæн хъуамæ рæвдауа, йæ курдиатæй адæмы зæрдæтæ чи хъуамæ лхæна, уый хъуамæ лæмбынæг кæса йæхимæ. Адæмы бæрны бацæуын тынг зын нæу. Адæмы цæсты хи бафтауын дæр - афтæ.
_
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv

Видео Дзырддаг систы канала iRYSTON TV