Wananchi Mbeya wahaha huduma ya maji, wanawake wahofia usalama wao

Mbeya. Wananchi wa mitaa ya Mponzi, Sinde, Chaula na Makunguru jijini Mbeya wameendelea kusotea huduma ya maji kwa zaidi ya miezi miwili tangu kukatika kwake, huku wanawake wakielelezea hofu yao kiusalama wanapoamka usiku kutafuta huduma hiyo.

Huduma hiyo ambayo ilipotea tangu Machi mwaka huu kwa baadhi ya maeneo, haijarejea tena na kufanya wakazi wa maeneo hayo katika Kata za Isanga, Ilemi na Ilolo kukosa maji na kusababisha adha kwa wananchi hao.

Kwa sasa wananchi huamka kati ya saa 10 hadi 11 alfajiri kutafuta huduma hiyo ambapo kimbilio kubwa imebaki kuwa chanzo cha Afrika ambapo asilimia ya wengi hupata msaada hapo, wengine wakitumia maji ya visima vya kuchimba ambayo si salama kwa afya.

Hata hivyo, tangu Mwananchi Digital kuripoti changamoto hiyo, Juni 10, mwaka huu mamlaka ya maji safi na usafi wa mazingira Mbeya (Mbeya Uwssa) walikiri uwapo wa tatizo hilo ikiahidi kufanyia kazi ikisema kwa sasa upo mgao.

Mwananchi imefika katika baadhi ya maeneo ambayo ni kimbilio kwa wananchi kupata maji ikiwamo chanzo cha maji Afrika na visimani na kushuhuhudia foleni ya wananchi wakiwamo watoto wadogo wakihangaika kupata huduma hiyo.

Wakizungumza leo Juni 28, baadhi ya wananchi wamesema tangu kukatika maji mwezi Machi, wamekuwa katika wakati mgumu ikiwamo kuamka nyakati za usiku wakisema hawajaona utekelezaji wa kumtua mwanamke ndoo kichwani.

Видео Wananchi Mbeya wahaha huduma ya maji, wanawake wahofia usalama wao канала Mwananchi Digital