ҚР Парламенті сенатының депутаты Бектас Бекназаров ақтөбеліктерді қабылдады

Анар Ертілеуова екі баланың анасы. Екі ұлы да биыл мектепке барады. Бірінші және екінші класс оқушыларын оқулықпен, киім-кешекпен қамту үшін оның жалақысы жетпейді. Пәтер жалдап тұратын жалғызбасты ана күйеуінен алимент өндіре алмай жүр. Сот арқылы ажырасып, әділет департаментіне нәпақа өндіруге арыз жазғанымен оның ісін қолға алған ешкім жоқ. Жауапты сот орындаушысы да бекітілмеді. Амалы таусылған ана көзіне жас алып, көмек сұрады. Көмек сұрап келген жалғызбасты ананың мәселесі енді сенат депутаты Бектас Бекназаровтың жеке қадағалауында болады. Ол көмекшілеріне істі созбалаңға салған сот орындаушыларын тауып, кездестіруді тапсырды. Тіпті, әділет департаментінің басшысымен тілдесіп, сұрақты жеке қадағалауға алуын тапсыратын болды.
Сондай-ақ, "Нұр Отан" партиясының ғимаратында өткен қоғамдық қабылдауға кәсіпкерлер, жоғары жалақысымен жұмыс іздеп жүрген ақтөбеліктер келді. Тіпті, сенатордан мектеп оқулығы туралы сұрағандар да болды. Қоғамдық қабылдауға келген әр адам өтініштерін қағаз бетіне түсірді. Кейін барлық сұрақтарға Бектас Бекназаров жазбаша жауап беретін болады. Ал оқулық жайын қалалық білім бөлімінің басшысы Ләззат Оразбаевамен жеке кездесіп, ақтөбеліктер үшін біліп беруге уәде етті.

Видео ҚР Парламенті сенатының депутаты Бектас Бекназаров ақтөбеліктерді қабылдады канала РИКА ТВ