ШҚО-ның Зайсан ауданында 4 жарым млрд теңгенің өнеркәсіп өнімі шығарылды

Шығыс Қазақстан облысының Зайсан ауданында биылғы жылдың алғашқы жарты жылдығында 4 жарым миллиард теңгенің өнеркәсіп өнімдері өндіріліпті. Бұл өткен жылмен салыстырғанда 17 пайызға артық. Ауданда экономиканы модернизациялау, инвестиция тартуға жете көңіл бөлініп келеді. Жақында инновациялық трактор зауыты іске қосылса, шаруалар да өндірген өнімдерін көрші Қытай мемлекетіне шығаруға ынталанып отыр.

Болат Көкенайұлы, тілші:

-Соңғы жылдары Шығыс қазақстан облысында Қытаймен біріккен инвестициялық тиімді жобалар саны артуда. Мұның өзі өңірдің экономикалық әлеуетін арттыруға септігін тигізуде. Ал «Майқапшағай» кеден бекетінде құны 6 миллиард теңге болатын ірі логистикалық кешен салынуда. Яғни болашақта көрші мемлекетпен сауда-саттық қарым-қатынас нығая түседі деген сөз.

Зайсанда құрастырылатын «Ертіс Т3» деп аталатын мына тракторда 45 аттың күші бар. Жер жырту, егін салу, қар күреу, тұқым себу жұмыстарының бәріне ыңғайлы. Шағын кәсіпорын қытайлық кәсіпкердің 80 миллион инвестициялық қаражатына ашылған. Бүгінге дейін 40 шақты техника құрастырылып, шаруаларға сатылған.

Мұратхан Қиямазанов, Зайсан аудандық кәсіпкерлік және ауыл шаруашылығы бөлімінің жетекшісі:

-Бұл тракторларға кооперативтерге 50 пайыз, шаруа қожалықтарына жері, малы болған жағдайда 30 пайызға дейін үкімет ақшасын субсидия ретінде қайтарып беріп жатыр. Осы қолға алынғалы өткен айда ғана 12 трактор көрші аудандарға сатылды.

Ал 5 шаруа қожалығының басын біріктірген мына кооператив қазір мал басын асылдандыруға баса мән беріп жатыр. 200 сиыр сауылатын сүт-тауарлы ферма, 3 мың басқа арналған мал бордақылау кешені және ет өңдеу комбинатын ашуды жоспарлап отыр. Құны 1 миилиард теңге болатын ірі жоба жүзеге асса, жергілікті 100 адамға жаңа жұмыс орны ашылады.

Асқар Аманжанов, кооператив директорының орынбасары:

-Өнімді өңдеп, экспортқа дайындағанымызда бізге өте қолайлы болып тұрғаны Қытай Халық Республикасы бізден 60 шақырым жерде орналасқан. «Майқапшағай» бекеті бар, етімізді де, сүтімізді де ары қарай шығарып, экспорттай аламыз.

Ауданда ілкімді жобалар қатары аз емес. Мәселен, алдағы жылдары табиғи газ және көміртек дикосидін өндіру зауытын ашып, темірбетон бұйымдарын шығаратын зауытты кеңейту жоспарланып отыр.

Авторлары: Болат Көкенайұлы, Медет Өмірханов, Берік Жобалайұлы

Видео ШҚО-ның Зайсан ауданында 4 жарым млрд теңгенің өнеркәсіп өнімі шығарылды канала Хабар NEWS