Xocalı, Xocavənd, Əsgəran, Ağdərəsiz Qarabağ problemi həll olundu demək çətindir - İQBAL AĞAZADƏ

12 yanvar 2021-ci il

Ümid Partiyasının sədri İqbal Ağazadə Reaksiya TV-də Zaur Qəriboğlunun təqdimatında “Siyasi reaksiya” verilişinin qonağı olub.
Aparıcının yanvarın 11-də Rusiya prezidenti Vladimir Putinin təşəbbüsü ilə Qarabağa dair Moskva zirvəsinin keçirilməsində nə qazanıldı və nə itirildi sualına cavab olaraq, İqbal Ağazadə bildirib ki, Rusiya nə bizim, nə də Ermənistanın nəsə əldə etməsi üçün çalışır. Rusiyanın məqsədi qazanmaqdır. Rusiya çalışır ki, tərəflər masada otursun, hansısa sənədləri imzalasın. Çünki regionda və dünyada gedən siyasi prosesləri bilir. Putinin Rusiyanın gələcəyi ilə bağlı o qədər də ümidli olmadığı göz önündədir. Rusiya çalışır ki, Qarabağ əhalisinə sübut etsin ki, Ermənistandan da, Azərbaycandan da çox Rusiya onların qarantıdr.

İqbal Ağazadə bildirib ki, müharibədən sonra bizim məqsədimiz masada danışıqlar prosesini uğurla davam etdirmək, bütün ərazilərdə Azərbaycanın suveren hüquqlarını tətbiq etmək, yerli əhaliyə də mesajları Azərbaycan dövləti adından vermək olmalıdır. Azərbaycan meydanda təklənmiş kimi görünür. Çünki Türkiyə masada deyil. Rusiya Ermənistan yançısı olan Avropa ölkələrinin Türkiyənin masaya daşınmasının əleyhinə olduğu faktordan istifadə edir. Türkiyə də bu məsələdə çəkingən və güzəştli mövqedə dayanmağa məcbur olur.

Hesab edirəm ki, 11 yanvar görüşünün nəticələri yalnız işçi qrupunun yaradılması ilə xarakterizə oluna bilər. Baş nazirlərin müavinlərinin tərkibində hər üç ölkənin nümayəndə heyəti və alt qurumlar cəlb olunacaq. İndiyə qədər dağınıq aparılan işlər mərkəzləşəcək. Amma hüquqi nöqteyi nəzərdən burada nə qədər anormal görünsə də, Ermənistanın bu prosesdə iştirak etməsi doğru deyil. Çünki ora Azərbaycan ərazisidir və Ermənistan baş nazirinin müavininin Azərbaycan ərazisinin bir hissəsində kommunikasiyanın və digər məsələlərin tətbiqində iştirakı doğru deyil. Çünki biz Ermənistan ərazisində hansısa projelerin həyata keçməsində iştirak etmirik.

Təcrübədə görünən budur ki, bir ölkə ilə kommunikasiya xətləri açılırsa, dəhlizlər yaradılırsa, nəqliyyat strukturları bərpa olunursa, bu ölkələr bir-birinin ərazi bütövlüyünü tanımalıdır. Hesab edirəm ki, Azərbaycan tərəfinin masaya qoyacağı ilk məsələ də BMT-nin 2 mart 1992-ci ildə Azərbaycanın tanıdığı sərhədləri çərçivəsində onun sərhədlərinin tanınması olacaq. Tanınma prosesindən sonra əlaqələr bərpa olunmalıdır.

Əgər Rusiya gerçəkdən sülhməramlı idisə, regionda barışın olmasını istəyirdisə, tərəflərin hər birinə BMT-nin tanınmış sərhədləri çərçivəsində bir-birinin ərazi bütövlüyünü tanımağı təklif etməli idi və tərəflər bunun üzərindən yola çıxmalı idi. Əsas məsələlər bundan sonra olacaq. Azərbaycan tərəfi çalışmalıdır, qarşısında böyük məsələlər dayanır. Çox istərdim ki, İşçi Qrupunun yanında məsləhət xarakterli Azərbaycan müxalifətinin nümayəndələri də olsun. Müxalifət də öz mövqelərini ifadə edə bilsin, cəmiyyətin fərqli kəsimlərinin nümayəndələri olsun. Məsələn, bununla bağlı məsləhət şurası yaradıla bilər. Hətta işçi qrupunun daxilinə də salmaq olar. Burda heç bir problem yoxdur. Bu, ictimai əsaslarla yaradılır. Yaradılacaq olan bu qurum dövlət üçün, xalq üçün, mənafeyimiz və mövqeyimiz üçündür.

Kommunikasiyaların açılması Azərbaycan üçün nə qazandırır – sualına İqbal Ağazadə belə cavab verib:

Kommunikasiyaların açılması proqramların başlanğıcıdır. Çünki hər bir müharibədən sonra tərəflərin doğru addım atması üçün xüsusi proqramlara ehtiyac var. Bir daha deyirəm, kommunikasiyaların açılmasından öncə ölkələrin ərazi bütölükləri tanınmalıdır. Biz açıq olmalıyıq dünyaya. Biz Cənubi Qafqazın lider dövləti, gerçək sahibiyik.

Biz hərbi geyimi əynimizdən çıxarmalıyıq. Əsasən də dünyaya bir mesajı tam çatdırmalıyıq ki, biz bu müharibəyə zorla cəlb olunduq, bizim torpaqlarımızı işğal etdilər və geri vermədilər deyə zorən getdik bu müharibəyə, düşmənə cavab olaraq.

Bəzi qüvvələr qələbəmizi gözdən salır – sualına partiya sədri bildirib ki, mən fərqli yanaşardım, bu məsələyə bu cür sərt rənglər çəkməzdim. O adamlar vətən yanğısı ilə ürəyi döyünən adamlardır. Onlar istəyir ki, Xankəndidə də Azərbaycan bayrağı dalğalansın. Bu da xoş niyyətdən irəli gəlir. Bizim bu müharibədən öncə istədiyimiz o idi, biz Şuşasız, Laçınsız, Kəlbəcərsiz Azərbaycan olmayacaq deyirdik. Bu gün isə ictimai şüura yeni düşüncə gəlir ki, Xocalı, Xocavənd, Əsgəran, Ağdərə olmadan Dağlıq Qarabağ problemi həll olundu demək mümkün deyil. Bu düşüncə ictimai düşüncəni gələcək qələbəyə hazırlayır.

Verilişdə aparıcı Zaur Qəriboğlu 2018-ci ildə İqbal Ağazadənin Qarabağ haqqında verdiyi proqnozun bu gün reallaşdığını qeyd edib.

İqbal Ağazadə bildirib ki, təxminən may ayında Ermənistanın Rusiyadan qopma prosesi başlayacaq. Belə ki, Ermənistan qərbyönümlü bir kurs götürəcək və Türkiyə-Ermənistan, Ermənistan-Azərbaycan münasibətləri çərçivəsində rus sülhməramlılarının bölgədən çıxarılması prosesi başlayacaq. Çünki Ermənistan ilk dəfə anladı ki, Rusiya öz maraqları ilə hərəkət edir.

https://www.youtube.com/watch?v=I6vYza9MOeg&t=559s

Видео Xocalı, Xocavənd, Əsgəran, Ağdərəsiz Qarabağ problemi həll olundu demək çətindir - İQBAL AĞAZADƏ канала İqbal Ağa-zadə