የቁጫ ሕዝብ ላይ እየደረሰ ያለው ግፍና በደል እንዲቆም ተጠየቀ

በደቡብ ብሔር ብሔረሰብ ሕዝብ ክልል የቁጫ ምርጫ ክልል የፓለቲካ ፓርቲዎች የጋራ ምክርቤት በትላንትናው ዕለት በአዲስአበባ በሰጠው መግለጫ እየደረሰብን ነው ያሏቸው ግፍና በደሎች በመዘርዘር መንግስት ሕግና ሥርዓትን እንዲያስከብር ጠየቁ።

በደቡብ ኢትዮጵያ የጋሞ ዞን ቁጫወረዳ፣ ቁጫ አልፋ ወረዳና ስላምበር ከተማ አስተዳደር የሚኖር ሕዝብ ላይ መዋቅራዊና የተራዘመ አፈና እየተፈፀመበት ነው ብለዋል።

በቁጫ ምርጫ ክልል የሚገኙ ኢዜማ፣ ነአፓ፣ ኢሶዴፓ፣ ቁሕዴፓ በጋራ በሰጡት መግለጫ በአካባቢው የአስተዳደር አካላት ደርሶብናል ካሏቸው በደሎች መካከል የቁጫ ክልል የፓለቲካ ፓርቲዎች ምክርቤት ፅ/ቤት ከሰኔ 19/2013 ዓ.ም ጀምሮ እንዲታሸግ ተደርጎ እስካሁን አለመከፈቱን ጠቅሰዋል።

ባለፈው ሀገራዊ ምርጫ የተፎካካሪ ፓርቲ አባላትን መርጠዋል ተብለው የተጠረጠሩ የአካባቢው ነዋሪዎች ህገወጥ እስር፣ ከስራ፣ ከትምህርት ማፈናቀል እየደረሰባቸው መሆኑም ብዙዎች ያለውን ጫና መቋቋም ባለመቻላቸው አካባቢውን ለቀው ለመሰደድ መገደዳቸውን ተናግረዋል።

የቁጫ አብዛኛው ሕዝብ ባለፈው ምርጫ የተቀናቃኝ ፓርቲዎችን በመምረጡ በግልፅ አስተዳደራዊና መዋቅራዊ ግፍና በደል እንዳጋለጠው ጠቅሰዋል።
አንዳንድ በሀላፊነት ላይ የተቀመጡ አካላት በብልፅግና እና በመንግስት ስም ከህግና ከስርአት ውጪ ሰዎችን ማሰር፣ መሰወር፣ ማስፈራራት፣ ማሳደድ፣ ከቤት ንብረታቸው፣ ከስራና የንግድ እንቅስቃሴዎች የማፈናቀል ድርጊቶች ተጠናክረው መቀጠላውን በመጥቀስ ድርጊቱ በአስቸኳይ እንዲቆም ጥሪ አቅርበዋል።

ያለፈውን ምርጫ ውጤት ባለመቀበል የብልፅግና ፓርቲ በፍርድ ቤት ያቀረበው ክስ የመጨረሻ ውሳኔ ሐምሌ 6/2014 ዓ.ም ማግኘቱን፣ በዚህ ውሳኔ የቁጫ ሕዝብ ዴሞክራሲያዊ ፓርቲ በምርጫ ክልሉ አሸናፊነቱ መረጋገጡን ጠቅሰዋል።

የጋራ ም/ቤቱ ተወካዮች እየደረሱ ነው ያሉት የሰብአዊና ዴሞክራሲያዊ መብቶች ጥሰቶች ወደአላስፈላጊ ግጭቶችና ቀውሶች ከማደጋቸው በፊት ተገቢውን የእርምት እርምጃበፍጥነት እንዲወሰድ ጠየቀዋል።

Видео የቁጫ ሕዝብ ላይ እየደረሰ ያለው ግፍና በደል እንዲቆም ተጠየቀ канала DireTube