Батыс Қазақстанда бүкіл ойын-сауық орталықтары мүлдем жабылуы мүмкін

Батыс Қазақстан облысында ойын-сауық орталықтары мен мейрамханалар мүлдем жабылып қалуы мүмкін. Оған өңірдің бас санитарының соңғы қаулысы себеп дейді ашынған кәсіпкерлер. Өйткені өзі 30 адамға ғана рұқсат етілген тамақтану орындары енді кешкі сағат сегізге дейін ғана жұмыс істейді деп бекітіліпті. Ал бұлай жұмыс істеп табыс табу мүлде ақылға қонымсыз дейді наразылар.
Батыс Қазақстан облысының бас санитарының соңғы қаулысы біраз кәсіпкердің жұмысына тосқауыл болыпты. Жаңа қаулыға сәйкес мейрамханалар кешкі сағат 20:00-ге дейін ғана жұмыс істейтін болса, ал жақында ғана санаулы көрермен кіргізуге рұқсат етілген кинотеатрлардың есігі қайта жабылыпты.
АЗАМАТ БАЙМУРЗИН, мейрамхана директоры:
– Адамдар алтыда жұмыстан шығады. Мейрамханаға келгенше сағат 7 болады. Ал бізге 8-де жабасыңдар дейді. Ол уақытта кім тамақтанып үлгереді? Одан кейін мейрамханамызға кім келеді?
Тек Батыс Қазақстан облысында неліктен қатаң режимдегі қаулыны қабылдағанын түсінбейміз дейді кәсіпкерлер. Соның кесірінен екі ортада шығынға шаш етектен баттық деп ашулы. Енді көбі мейрамханаларын жауып, ондағы жұмысшыларды босатуға мәжбүр болып отырғандарын айтады. Ал соңғы шыққан қаулы әсіресе кинотеатрлардың басшыларын тіпті әбігерге салған.
ЕЛЕНА ЯЩЕНКО, Ойын-сауық орталығы директорының орынбасары:
– 21-не дейін бізге жұмыс істеуге рұқсат берді. Біз кинокомпаниялардан кино сатып алып қойып едік. Ақшасын төлеп қойдық. Енді бізге жабыңдар дейді. Біз сонда не істейміз?
Ал жауапты мамандар қазіргі кезде облыс көлемінде індет жұқтырғандар саны күн санап көбейіп келеді дейді. Эпидемиялогиялық ахуалдың қиындауынан шектеу шараларын күшейтуге тура келді деп отыр.
САЛТАНАТ ЕРАЛИНА, БҚО санитарлық эпидемиялогиялық департаментінің бас маманы:
Ѿ Облыстық инфекциялық ауруханалардағы төсек орындардың 50 пайызының толуына байланысты ҚР Бас мемлекеттік санитарының қаулысына сәйкес өңірімізде карантин шаралары күшейтілді. Бұл қаулыны өңіріміздің қызыл аймаққа енуіне байланысты шешім қабылданды.
Ал төрт күн бұрын қызыл аймаққа енгізілген Оралдағы кәсіпкерлер құрдымға кеткен кәсібімізге ең болмаса мемлекет тарапынан көмек көрсетілсе екен дейді
Абай Нұржанұлы, Медет Медресов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#кәсіпкерлер_дауы #карантин_кесірі

Видео Батыс Қазақстанда бүкіл ойын-сауық орталықтары мүлдем жабылуы мүмкін канала Информбюро 31