جوتھی کبھی مری جاۓ اماں نہیں رہی ہے فرحت عباس شاہ

تازہ غزل

جو تھی کبھی مری جاۓ اماں نہیں رہی ہے
تری طرف تو بھلے ہو یہاں نہیں رہی ہے

حساب مجھ سے تو تب ہو مرے لیے دوزخ
کہاں کہاں یہ تہ ِ آسماں نہیں رہی ہے

اُبل اُبل کے گزاری ہے زندگی میں نے
زمین میرے لیے گلستاں نہیں رہی ہے

جو بچ گٸے ہیں وہ اک دوسرے سے پوچھتے ہیں
کہاں رہی ہے قیامت ، کہاں نہیں رہی ہے

وطن ہمارا نہیں تھا یہ اب کُھلا ہم پر
وہ جھوٹی موٹھی کی بھی داستاں نہیں رہی ہے

ہم اب کسی کے بھی دھوکے میں آنے والے نہیں
کہ گرد صاف ہوٸی ہے دھواں نہیں رہی ہے

مرا عقیدہ تو ٹوٹا مگر ہوا اچھا
سرشت ِ شاہ بھی فرحت نہاں نہیں رہی ہے

میں وقفے وقفے سے مرتا رہا ہوں جس کے لیے
حقیقتاً وہ کبھی میری جاں نہیں رہی ہے

تمہاری جان پہ بن آٸی ہے تو کیا مری جاں
پچاس سالوں سے وقف ِ بتاں نہیں رہی ہے

ترے سکون پہ خرچ ہوتی آٸی ہے اب تک
سوال یہ ہے کہ یہ راٸیگاں نہیں رہی ہے
فرحت عباس شاہ

Видео جوتھی کبھی مری جاۓ اماں نہیں رہی ہے فرحت عباس شاہ канала Lahore Tv