Шенеуніктердің қатесі. Ақмола облысында 100-ге жуық кәсіпкер жайылымсыз қалуы мүмкін

Биыл Ақмола облысындағы 100 - ге жуық шаруа қожалығы жайылымсыз қалуы мүмкін. Себебі прокурорлар малшылардың жайылым жерін заңсыз деп тауып, шаруалардан жерді мемлекетке қайтарып беруін талап етіп отыр. Ал шаруалар үкімет берген жерде мал санын енді арттырып, жағдайымымызды жақсарта бергенде құзырлы органдардың бұл талабы барып тұрған әділетсіздік деп отыр.
Авхад Ақаев жылқы, ірі қара, қой өсіріп отырған шаруа. Тіпті мемлекеттен көмек алып, бірнеше бағдарламаның шарттарын орындап, мал басын көбейтіп те алған. Нәтижесінде аудандық әкімдік жайылымға деп 300 гектар жайылымдық, шабындық деп 50 гектар жер беріпті. Үкімет жарылқады деп жүргенде кезінде заңсыздық болыпты деп прокурорлар телімді қайтарып беруді талап еткен.
АВХАД АҚАЕВ, кәсіпкер:
– Жайылым болмаса малым қайтып күн көреді. Жыл он екі ай қорада мал баққан бола ма? Мал өсір дейді, өсірсең өстиді. Жайылымды алғалы жатыр. Аукционсыз беріліпті деді. Оған мен кінәлі емеспін ғой. Сойып салайын десем алған техникам, төлейтін кредитім бар.
"Еңбек" бағдарламасының арқасында шаруасын дөңгелектен Галина Квапиштың да енді ісі өнбейтіндей. 128 гектар жайылымы кеткелі тұр.
ГАЛИНА КВАПИШ, кәсіпкер:
– Ерте көктемде шығарып, қарашаға дейін жаямыз ғой. Сол жайылымның арқасында күніне 1 тонна сүт сауамыз. Біз мал соңындағы адамбыз. Қағаз қууды білмейміз ғой. Жерді берген кезде қарамай ма қателікті?
Құжатты шаруаларға Астрахан ауданының әкімдігі берген.
НҰРЛАН МҰХАМЕДЖАНОВ, Астрахан аудандық жер қатынастары бөлімінің басшысы:
– Мал шаруашылығы дамысын деп жайылымды аукционсыз бердік. Прокуратура кез-келген жер телімі тек қана аукционмен берілу керек дейді. Қателік бізден кеткенін мойындаймыз.
Облыста 100-ге жуық шаруашылық осылайша жоқ жерден от басып отыр. Жайылымды әзірге пайдаланғандар қайтаруға тиіс.
РҮСТЕМ ТӨКЕНОВ, Ақмола облыстық жердің пайдаланылуын бақылау басқармасы басшысының орынбасары:
– Бұл жерлер түгел алынып қояды деп айтуға болмайды. Бір механизм бүгінгі күні бар. Облыстық прокуратурамен талқыланып жатыр.
Істің тап қашан әрі қалай шешілері әзірге беймәлім.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#жайылымсыз_жұрт #бюрократия #Қазақстан

Видео Шенеуніктердің қатесі. Ақмола облысында 100-ге жуық кәсіпкер жайылымсыз қалуы мүмкін канала Информбюро 31