Көлік жүргізушілеріне машиналарын тіркеу жолдары түсіндірілді

Тығырыққа тірелген көлік жүргізушілерінің мәселесі қалай шешіледі? Сонау Армения мен Қырғызстан, Ресейден әкелінген көліктерге қатысты қандай шара қолданылады? Бүгін халықтық кеңсе ғимаратында осы және жол қозғалысы, құқық саласына қатысты сұрағы бар адамдар үшін қоғамдық қабылдау өтті. Қабылдауда тұрғындардың сауалына облыстық полиция департаменті әкімшілік полиция басқармасының мамандары жауап берді. Әкімшілік полиция басқармасы процессинг орталығының басшысы Ерлан Алтынбаевтың айтуынша қырғыз, армян нөмірлерімен жүрген темір тұлпар иелерінің дүрлігуіне еш негіз жоқ. Әзірге түсіндіру жұмыстары жүріп жатыр. Ешқандай әкімшілік шара қолданылмайды. Полиция қызметкерлерінің уәжі әзірге көлігіңмен қорықпай жүре бер дегенге саяды. Қала көшелерінде мұндай 16 мыңға жуық көлік жүйткіп жүр. Шетелден әкеліп, құжатын заңдастырмаған темір тұлпар иелері былтыр мыңға жуық жол ережесін бұзған. Ел бойынша Армения, Қырғызстан, Беларусь және Ресейде тіркелген 170 мыңнан астам көлік бар. Былтыр ол көліктер 90 мың рет жол ережесін бұзған. Салынған айыппұл бір миллиард теңгеден асады. Бүгін полиция өкілдеріне көшедегі тәртіп, қауіпсіздік бойынша ескертпе жасаушы ақтөбеліктер де табылды. "Жолдағы қабылдау" акциясы кезінде жарты күн ішінде полиция қызметкерлерінен 230-дан астам адам кеңес алды. Оның сексен пайызы өзге елдерден көлік сатып алып келген азаматтар. Әлеуметтік желіде өткен онлайн қабылдауға жүгінгендер де бар. Сонымен қатар облыстық полиция департаментінде "қауырт желі" жұмыс істейді. 936-139 нөміріне қоғырау шалып, телефон арқылы да кеңес алуға болады. 2014 жылы шыққан "Жол қозғалысы туралы" заңның 63-бабына сәйкес барлық көлік Қазақстанда 10 күннің ішінде тіркелуі керек. Басқа елден көлік әкелгендер оны заңдастыруға міндетті.

Сайт телеканала http://www.rikatv.kz/
Twitter https://twitter.com/rika_kz
Вконтакте https://vk.com/rikatv

Видео Көлік жүргізушілеріне машиналарын тіркеу жолдары түсіндірілді канала РИКА ТВ