Д.К. Сивцев - Суорун Омоллоон "Ороһустуба киэһэ" кэпсээнин ааҕыы

Бу – саха норуодунай суруйааччыта, Социалистическай Үлэ Дьоруойа, Саха Өрөспүүбүлүкэтин бочуоттаах олохтооҕо, Былатыан Ойуунускай уонна Өксөкулээх Өлөксөй ааттарынан Судаарыстыбаннай бириэмийэлэр лауреата Д.К.Сивцев –Суорун Омоллоон төрөөбүтэ 115 сылыгар Дьокуускай куорат 38 №-дээх оскуолатын 11 кылааһын үөрэнээччилэрэ кини айымньытын ааҕыыга бастакы холонуулара буолар.
.
Тоҕо чуолаан бу айымньы талылынна?
.
Ааптар былыргы олохтон этюд диэн ааттаан суруйбут «Ороһустуба киэһэ» кэпсээнигэр сытыы уонна дириҥ проблемалары туруорбута харахха быраҕыллар:
.
1. Саха норуота нуучча омугун итэҕэлигэр, о.э. христианныы (православнай) итэҕэлгэ сыһыана.
2. Бу айымньыга ииппит аҕаны кытта сыһыан холобуругар кырдьаҕас киһиэхэ сыһыан айгырааһына арылхайдык көстөр.
3. Оччотооҕу ыарахан кэм сүрүн кыһалҕаларын бэлиэтээн туран, суруйаччы норуот олоҕун кырдьыктаахтык көрдөрөр.
4. Хамначчыт кыра–хара киһи майгыта кини тылыгар – өһүгэр, туттарыгар–хаптарыгар олус итэҕэтиилээхтик ойууламмытын бэлиэтиир тоҕоостоох.
.
Маны таһынан, кылгас эрээри, күүстээх сэһэргиир, ойуулуур ньымаларынан баай, ааҕааччыны сөхтөрөр, элбэххэ үөрэтэр айымньы быһыытынан сыаналыахха сөп.
Д.К. Сивцевы «эдэр ааҕааччылар чугас доҕордоро» диэн ааттаабыттара оруннаах: кини оҕолорго анаан суруйбут айымньыларыгар былыргы олох туһунан уус-уран тылынан тиэрдэр ньымата үгүс.
.
Бу айымньыга олоҕуран режиссер В.Фомин туруорбут испэктээҕэ Саха тыйаатырын сыанатыгар көрөөччу дьүүлүгэр тахсыбыт.

Видео Д.К. Сивцев - Суорун Омоллоон "Ороһустуба киэһэ" кэпсээнин ааҕыы канала Библиотека - филиал № 21 «Созвездие»