Қабілетсіз шенеуніктер халықтың қасіреті

Пандемияда еліміздегі кедейлердің саны миллионнан асып кетсе де біздегі шенеуніктердің қазына қаржысын қанағатпен жұмсайтын күнін көрмейтін секілдіміз. Бір ғана Атырау облысында бюджет ақшасына алынып, ақыры пайдаға аспай тұрған дүние-мүлік көп. Мысалға, былтыр әкімдік өкілдері аралдағы ауылға 100 миллион теңгеге кәдімгі кеме сатып алады. Ең қызығы техника алынғанмен, оны жүргізетін адам табылмай жатыр. 100 миллионға кеме алуға асыққан шенділер мұндай техниканы басқара алатын маманның жоқ екенін ескермеген көрінеді.
Ал 80 миллионға жуық теңгеге қоқыс контейнерлерін алдырған шенеуніктер оны қозғайтын техниканы сатып алуды ұмытып кетіпті. Сөйтіп, қыруар қаржыға алынған техникалар қазір күн астанды қаңырап тұр.
Атырау облысы Құрманғазы ауданындағы Көптоғай ауылы Ресеймен шекаралас, аралда отырған ел. Ауылға кіріп-шығатын 30 тонналық жүзбелі көпірдің де, оны сүйрейтін кеменің де әбден тозығы жеткен. Осыны ескерген әкімдік өткен жылы 100 миллион теңгеден астам қаржыға «БК-100» маркілі баркас сатып алған. Бірақ, халық оның игілігін көре алмай отыр. Өйткені үлкен кемені әкелгендер оны іске қоса алмай қойған. Ал, ескі кеме қыста мұзды жара алмай, көптоғайлықтар аралда қалады екен. Қыруар қаржыға алынған баркас қазір жағалауда қаңырап тұр. Ал әкімдіктегілер "бәрі бақылауда" дегеннен басқа мардымды жауап бере алмай отыр.
ҚҰРМАНҒАЗЫ АУДАНЫ ӘКІМДІГІ:
– Кемені Көптоғай ауылдық округінің теңгеріміне беру жөнінде жұмыстар ұйымдастырылуына байланысты «БК-100» маркалы сүйрептелі кеме уақытша пайдаланылмай отыр. Осы жылдың қазан-қараша айында іске қосылады.
Ал Құлсары қаласына 2019 жылы «Экобин» деп аталатын мынадай жартылай жерге көмілген ерекше қоқыс контейнерлердің 81 данасы орнатылған. Бұған 72 миллион теңгеден астам қаржы жұмсалыпты. Бірақ, содан бері контейнерлер бірде бір рет пайдаға аспаған. Өйткені мұны пайдаланатын ауданда арнайы техника жоқ. Ал жылдар бойы босқа тұрған қоқыс контейнерлерін тұрмыстық қалдықтарды тазалауға өте тиімді деп мақтаған қала әкімдігі мәселе жақын арада шешіледі дейді.
ҚАДІРЖАН АДИНОВ , Құлсары қаласы әкімінің орынбасары:
– Ресей федерацисынан 81 дана қоқыс контейнерін әкеліп, 49 жерге орнатты. Жақын арада мемлекеттік сатып алудың жеңімпазы анықталады деп күтілуде. Мемлекеттік сатып алудың жеңімпазы анықталған соң Құлсары қаласына санитарлық тазалық жұмыстарын жүргізетін мердігер мекеме бұл контейнерлерге қызмет көрсету жұмыстарын бастайтын болады.
Мұндай экобиндердің бес жарым миллион теңгеге алынған алты данасы Индер ауданында да босқа тұр. Бұл да Атырау облысындағы мақсатсыз жұмсалған жүздеген миллионның мүліктері.
Жанат Молдашова, Фархат Тәжібаев
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#желге_ұшқан_миллиондар #тендер #шенеуніктер

Видео Қабілетсіз шенеуніктер халықтың қасіреті канала Информбюро 31