Жоғарыдан тағайындалғандар төмендегі халыққа төбеден қарайды

Біздің елде қала әкімі түгілі мектеп директорлары да сайланбайды. Тағайындалады. Жоғарыдан тағайындалғандардың төмендегі халыққа төбеден қарайтыны да содан болар. Атырау облысы Жылыой ауданы Жаңа Қаратон ауылының мектеп ұжымы жаңадан келген мектеп директорынан бас тартып жатыр. Ұстаздар білім бөлімінің басшылары директорды заңсыз тағайындады деп наразы. Бұл аздай мектеп ұжымы жылдар бойы еңбекақылары мен әлеуметтік төлемдерінен ақша желініп келгенін айтады.
Бұл Атырау облысы Жылыой ауданы Жаңа Қаратон ауылындағы нөмірі 22 мектеп ұжымы. Бірнеше жылдан бері еңбекақымызды еселеп жеді, заңсыз төлемдер ұсталды деген олар білім басқармасынан бастап, барлық құзырлы органдарға шағымданған. «Бірақ еш нәтиже жоқ, соңғы амалымыз мұңымызды министрлікке жеткізу» дейді олар.
АЙМАН ЛҰҚПАНОВА, мұғалім:
– 2018-19 оқу жылында менің еңбекақымнан 7 ай бойы 350 мың теңге ұстады. Содан мен бухгалтерге барып «бұл қомақты ақша, не үшін мұны ұстап отырсың? Мен көп балалы анамын, балаларымның тамағынан жырып ұстап отырсыздар, маған заңды дәлелін беріңдер» дегенімде «маған бас бухгалтер ұста деді, сол үшін ұстап жатырмын дейді.
«Жылдар бойы адал ақымыз талан-таражға түсті, оның шешімін таппай жүргенде заңсыз жолмен тағы жаңа басшы келді» дейді мектеп ұжымы. Білім бөлімі ата-аналар мен ұжымның қарсылығына қарамастан директорды қызметіне тағайындап кетті деп ашулы.
АЙНАГҮЛ ШАЙХИНА, мұғалім:
– Біздің мектепте көп мәселе бар. Соның бірі бүгін мектепке директор сайлады. Бүгін отырғызып кетті. Біз мұғалімдер шағын ауыл болған соң бәрін ол басшының қандай жолмен келгенін естіп отырмыз. Біз заңсыз жолмен келіп отыр деп ойлаймыз. Қамқоршылық кеңесі ол кісіні мүлде ұсынбаған.
Жаңа басшы ұжым қарсы болғанымен барлық сынақтан заңдылықтарға сай өттім дейді. Ал білім бөлімі басшыларының сөзінше бәрі заңды. Еңбекақыға қатысты есеп-қисаптарды да түзетіп жатыр.
АЙБАРША ҚАҚПАНБАЕВА, Атырау облысы Жылыой ауданы білім бөлімінің басшысы:
– Қамқоршылық кеңестің жұмысына қатысқан жоқпыз, қатыса алмаймыз. Ол біздің құзіретімізге жатпайды. Алайда олардың шешімнде Кенжегалиева Райгүл Алданованаға келісімін беріп тұр. Мен ол мектептің зейнетақы, салықтарын есептеттім, 2019 мен реттеп бердім, оның арғы жағындағы жылдарға 2016, 2017, 2018 ол кісілер аудит сұраған боолатын. 9 және 22 мектепте осындай заңсыздықтар болды.
Облыстық білім басқармасы бұл мәселені бақылауға алғандарын айтады. Алайда мектеп ұжымы министрліктің араласуын сұрайды.
Жанат Молдашова, Фархат Тәжібаев
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Жылыой #ұстаздар_наразылығы

Видео Жоғарыдан тағайындалғандар төмендегі халыққа төбеден қарайды канала Информбюро 31