Xanımına vida mesajı yazıb son döyüşünə yollandı - REPORTAJ

Vətənin dar günündə dadına çatan, torpaqların bütövlüyü uğrunda mübarizəyə qoşulan, Vətən Müharibəsinin başlandığını elan edib səngərə yollanan oğlanlardan biri də Vaqif Vüqar oğlu İsmayılzadə idi.

APA TV-nin Qarabağ bürosunun xəbərinə görə, Beyləqan rayonunun Birinci Şahsevən kəndində dünyaya gələn Vaqifin 24 yaşı vardı.

Bu 24 ildə hərbi xidmətini başa vurmuşdu, sevdiyi qızla ailə qurmuşdu, 2 oğlu vardı. Hərbi polisdə çalışırdı. Vətən Müharibəsi başlayanda 3 dəfə rəisinin otağına girib müharibəyə yollanmaq üçün icazə istəmiş, yalnız sonuncu görüşündə buna nail olmuşdu...

Atası Vüqar İsmayılov deyir ki, Vaqif hər dəfə ailəsi ilə danışanda “məndən nigaran olmayın, bu torpaqlar cənnətdir” deyirmiş. Və şəhid olaraq cənnət dediyi torpaqlarda əbədi qalmaq üçün tələsdi: “Hərbi polis idi. İki dəfə ərizə yazıb, komandiri qəbul etməyib, üçüncü də gedib. Dözə bilmirdi, ərizə yazıb getdi. Xocavənd rayonun Axul kəndində maşında 3 nəfər olub, ermənilər minaatanla vurublar”.

Anası Simnarə xanım deyir ki, Vaqifin döyüş yoldaşlarını dəfələrlə ölümdən xilas etdiyini sonradan biliblər: “Mənim oğlum çox anaların gözünü yoldan yığıb. Çox yaralıları daşıyıb gətirib xəstəxanalara çatdırıb. İndi onun şəklini görüb bizə zəng vururlar ki, biz bu oğlanı axtarıb tapıb təşəkkür etmək istəyirdik. Çox yaralıların, şəhidlərin ailələri bizə zəng vurur. Nə qədər yaralılara kömək edib mənim oğlum. Şükür ki, mənə 2 övlad verib getdi, təskinliyi onlardan alıram”.

Vaqifin böyüdüyü ailədəki kişilərin çoxu Birinci Qarabağ Müharibəsi iştirakçısı olub. Ona görə də ailəsi Vaqifi getdiyi yoldan döndərə bilməyəcəyi ilə barışıb. Əmisi Əli ismayılovun sözlərinə görə, hər dəfə telefonda danışanda deyirmiş ki, “bir az da səbir edin, sizi gəlib aparacağam işğaldan azad olunan o torpaqlara”: “Müharibə başlayanda Vaqifə dedim ki, atan da, mən də 4 il döyüşdə olmuşuq. Nə iş görsəniz, səbirlə, tələsmədən edin. Özü öz ərizəsi ilə xahişi ilə getdi. Deyirdi, əmi, buralarda nə var ki, gəzməli-görməli torpaqlarda alçaqlar oturub. Torpaqlar azad olsun, gəzməli-görməli, yaşamalı torpaq o tərəfdir. Vaqif çox istiqanlı, qorxu bilməyən uşaq idi. Mənə deyirdi, ola bilsin, getdim Şuşaya. Bir müddət də axtarış vaxtı narahat olduq. Komandirləri də elə başa düşdü ki, Vaqif qoşulub 052-nin uşaqlarına, irəli gedib. Axırı oktyabrın 25-də şəhid olduğunu bizə dedilər”.

Şəhidimiz ən çox adaşı olan Vaqif babasını Şuşaya aparmaq üçün tələsirmiş: “Bütün şəhidlərə canım qurban. Vaqifin qabağında ölüm. Allah şəhidlərimizə rəhmət etsin, Prezidentimizin üstündə yar olsun!”

Vaqifin sonuncu zəngi oktyabrın 20-də atasının ad günündə olub. Bütün ailə üzvləri ilə danışıb: “Axırıncı dəfə atamın ad günündə zəng elədi. Onda belə ailəlikcə danışdıq, “narahat olmayın, yaxşıyam, məndən narahat olmayın” dedi. Allah bütün şəhidlərimizə rəhmət eləsin. Bütün atalara, analara, bacılara səbir versin”.

Təsadüfdən kiçik oğlu məhz həmin gün “ata” sözünü deməyi öyrənib. İki övladının anasına isə son mesajı oktyabrın 21-də olub: “Oğlu ata demirdi. Sonuncu dəfə zəng vuranda oğlumuz ona ata dedi. Çox sevindi, dedi, ata sənə qurban, sənin ata deyən dilinə qurban. Ayın 21-i gecəsi mənə son mesajı yazıb. Səhər oyandım, gördüm mesaj yazıb ki, övladlarımı sənə, səni də Allaha əmanət edirəm. Zəng vurdum, zəng çatmadı”.

Qeyd edək ki, Prezident İlham Əliyevin sərəncamı ilə əsgər Vaqif İsmayılzadə ölümündən sonra “Vətən uğrunda” medalı ilə təltif edilib.
Rəsmi facebook səhifəmiz: https://www.facebook.com/tvapaxeber
Rəsmi instagram səhifəmiz: https://www.instagram.com/apatvresmi/
Rəsmi twitter səhifəmiz: https://twitter.com/apatvofficial
#apatv #apaxeber

Видео Xanımına vida mesajı yazıb son döyüşünə yollandı - REPORTAJ канала APA TV