PREZİDENT İLHAM ƏLİYEV NÖVBƏTİ DƏFƏ NİKOL PAŞİNYANIN YALANLARINI İFŞA EDİB

Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır. Prezident İlham Əliyev Şərq Tərəfdaşlığı ölkələrinin videokonfrans formatında Sammitində çıxışı zamanı belə deyib. İki il bundan əvvəl Brüsseldə Azərbaycan və Avropa İttifaqı arasında “Tərəfdaşlıq Prioritetləri” sənədinin paraflandığını xatırladan dövlət başçısı deyib ki, burada hər iki tərəfin müstəqillik, suverenlik, ərazi bütövlüyü və beynəlxalq səviyyədə tanınmış sərhədlərin toxunulmazlığı prinsiplərinə sadiqliyi vurğulanır. Ermənistan və Azərbaycan arasında olan münaqişə eyni prinsiplər əsasında həll edilməlidir.
Dövlət başçısı deyib ki, işğala və humanitar fəlakətə baxmayaraq, Azərbaycan sosial-iqtisadi inkişafda böyük nəticələr əldə edib. Son 16 ildə ümumi daxili məhsulumuz 3 dəfə artıb, yoxsulluq səviyyəsi 49 faizdən 5 faizə enib. Avropa İttifaqı bizim əsas ticarət tərəfdaşımızdır. Prezident İlham Əliyev Avropa İttifaqının enerji təhlükəsizliyində mühüm rol oynayacaq Cənub Qaz Dəhlizi layihəsinin önəminə diqqət çəkib. Ölkəmizin koronavirus pandemiyasına qarşı gördüyü tədbirlər barədə tədbir iştirakçılarına məlumat verib.
Tədbirdə iştirak edən Ermənistanın baş naziri Nikol Paşinyan replika ataraq Azərbaycanı irqçi siyasət yürütməkdə ittiham edib. O, Ramil Səfərovun əfv edilməsini guya buna nümunə kimi göstərib. Azərbaycan prezidenti Nikol Paşinyanın bu replikasına cavab verərək, onun yalanlarını ifşa edib.
Prezident İlham Əliyevin çıxışında xatırlatdığı hadisə 1983-cü il iyulun 15-də Parisin Orli hava limanında baş vermişdi. ASALA terror təşkilatının üzvü Varujan Karapetyanın başçılığı altında həyata keçirilən, Türk Hava Yollarının kassası qarşısında törədilən qanlı terror aktında həlak olan 8 nəfərdən 2-si Türkiyə, 4-ü Fransa, 1-i ABŞ, 1-i isə İsveç vətəndaşı idi. Terror zamanı 55 nəfər də yaralanmışdı. Karapetyan istintaqa ifadəsində hadisəni törətdiyini boynuna alaraq, əslində, əsas məqsədin bombanı təyyarənin içində partlatmaq olduğunu etiraf etmişdi. Törətdiyi cinayətə görə Fransa məhkəməsi onu ömürlük həbs etsə də, 2001-ci ildə Karapetyan Ermənistana ekstradisiya olunur. Burada qəhrəman kimi qarşılanan terrorçu Ermənistanın ovaxtkı baş naziri Andranik Marqaryan tərəfindən qəbul edilir, mənzil və işlə təmin olunur. Bu, bir daha onu göstərir ki, qanlı terror törədən insanın Ermənistanda qəhrəmanlaşdırılması adi haldır. Bu, Ermənistanda terrorizmin dövlət səviyyəsində dəstəkləndiyini göstərən çoxsaylı faktlardan biridir.

Видео PREZİDENT İLHAM ƏLİYEV NÖVBƏTİ DƏFƏ NİKOL PAŞİNYANIN YALANLARINI İFŞA EDİB канала CBC FM Azerbaijan