Мирзиёев 20 йиллик шартли қамоққа ҳукм этилган Тошкент собиқ ҳокимини яна "қурилиш"га қайтарди

Ўзбекистон президентлигига сайланган Шавкат Мирзиёев Тошкент шаҳар собиқ ҳокими Козим Тўлагановни Давлат архитектура ва қурилиш қўмитасининг Лойиҳалаштириш ва қурилиш-монтаж ишлари сифатига риоя этилиши устидан Давлат назорати бош бошқармаси бошлиғи этиб тайинлади.

Козим Тўлаганов 2006 йилда Тошкент шаҳар суди томонидан иқтисодий жиноятларда айбланиб, 20 йил шартли қамоқ жазосига ҳукм қилинган эди.

​Озодлик суҳбатлашган бир неча манбага кўра, янги сайланган президент Тўлагановнинг қурилиш соҳасидаги улкан тажрибасини инобатга олиб¸ ҳукумат таркибига қайтарган.

Озодлик манбаларига кўра, Шавкат Мирзиёев сайловолди кампанияси доирасида 24 ноябрь куни Тошкент шаҳри фаоллари билан учрашуви ортидан Козим Тўлагановни Давлат архитектура ва қурилиш қўмитасидаги олти бошқармадан бирининг бошлиғи этиб тайинлаган.

Бу тайинлов ортидан 4 декабрь куни Ўзбекистон президентлигига сайланган Бош вазир Шавкат Мирзиëев Тошкент собиқ ҳокимига пойтахтни ривожлантириш дастури устидан назорат этиш вазифасини юклаган.

Ушбу дастур доирасида 2017-2022 йилларда Тошкентнинг Сергели даҳасида замонавий талабларга жавоб берувчи 500 кўпхонали уйлар қуриш режаланган.

Бундан ташқари, дастурда пойтахтда истироҳат боғлари, яшил ҳудудлар барпо қилиш, метро йўналишлари бўйича қурилишларни тезлаштириш кўзда тутилган.

Видео Мирзиёев 20 йиллик шартли қамоққа ҳукм этилган Тошкент собиқ ҳокимини яна "қурилиш"га қайтарди канала Ozodlik Radiosi