matara Uyanwatta dharmarathna mawatha murder | මාතර රෝහල අසල අභිරහස් කාන්තා මළසිරුරක්

මාතර උයන්වත්ත – ධර්මරත්න මාවතේ (මහ රෝහල අසල) නිවසකින් අභිරහස් ලෙස ඝාතනය කරන ලද කාන්තාවකගේ මළසිරුරක් හමුවී තිබෙනවා.

67 හැවිරිදි මෙම කාන්තාව මාතර රෝහලේ පිටුපස ගේට්ටුව අසල කඩයක් පවත්වාගෙන ගොස් ඇත.

එමෙන්ම ඇය රෝහල අසලම පිහිටි ස්ථානයක පදිංචිව සිට ඇත.

ඝාතනයට ලක්වූ කාන්තාවගෙන් දින දෙකක් පුරා කිසිදු ක්‍රියාකාරකමක් නිරීක්ෂණය නොවීමත්, නිවසේ විදුලි බුබුලු දිගටම දැල්වී තිබීමත් හේතුවෙන් අසල්වැසි කාන්තාවක් විසින් මාතර මූලස්ථාන පොලීසිය වෙත දැනුම්දී තිබෙනව.

එම තොරතුර අනුව ක්‍රියාත්මක වූ පොලීසිය ඔක්. 02 වනදා සවස එම නිවස පරීක්ෂා කර ඇත.

පොලීසිය අදාල නිවස වෙත පැමිණෙන වේලාවේදීත් නිවස තුල විදුලි බුබුළු දැල්වී තිබී ඇති අතර කාන්තාවගෙන් කිසිදු ප්‍රතිචාරයක් ලැබී නැත.

පසුව අපරාධ ස්ථාන පරීක්ෂණ නිළධාරීන් (SOCO) විසින් වැඩබලන මහේස්ත්‍රාත් පාලිත හෙට්ටිආරච්චි මහතා සමඟ නිවසට ඇතුලුවී ඇත.

එහිදී ඝාතනයට ලක්වූ කාන්තාව රෙදිපටි කැබැල්ලක් උපයෝගී කරගනිමින් සාලයේ තිබූ පුටුවකට ගැටගසා තිබෙනු දක්නට ලැබිණ.

වැඩිදුර පරීක්ෂා කල මාතර මූලස්ථාන පොලීසියේ අපරාධ විමර්ශන අංශයේ නිළධාරීන් නිවසේ අල්මාරිය ඇර දමා ඇති ආකාරයත් ඝාතනය වූ කාන්තාවට අසල්වැසි කාන්තාවක විසින් පසුගිය 31 වනදා රාත්‍රී කාලයේ ගෙනැවිත් දුන් රාත්‍රී ආහාර වේලේ ඉතිරි කොටසද සොයා ගන්නා ලදී.

සැකකරුවන් ස්ථානයේ දමාගොස් තිබූ සාක්ෂි පදනම් කරගෙන පොලිස් නිළ සුනඛ ඔස්කා සහ ඔහුගේ භාරකරු පො.කො. 86366 සම්පත් යන දෙදෙනා සැකකරු ගමන්ගත් මාර්ගය සොයාගන්නා ලදී.

මාතර මූලස්ථාන පොලීසියේ අපරාධ විමර්ශන අංශයේ නිළධාරීන් විසින් සිදුවීම සම්බන්ධයෙන් වැඩිදුර පරීක්ෂණ ක්‍රියාත්මක කරනු ලබයි.

Видео matara Uyanwatta dharmarathna mawatha murder | මාතර රෝහල අසල අභිරහස් කාන්තා මළසිරුරක් канала SL Today