Алматыдағы көлік қозғалысы келер жылдан бастап айтарлықтай жеңілдей түспек

Алматы әкімдігі биыл да қалаға соңғы жылдары қосылған аумақтарға жол салу мен бар жолдарды жөндеуді басым бағыт етіп отыр. Қала әкімі Бақытжан Сағынтаев "Инфрақұрылымды қайта жаңғыртудың арқасында осы айдың соңына дейін қала бойынша сапасы жақсы жолдардың үлесі 80 пайызға жетеді" дейді. Ал жолайрықтарды салу жұмыстарының толыққанды аяқталуына әлі 1-2 жыл уақыт кетеді екен.
Алматыдағы көлік қозғалысы келесі жылдан бастап айтарлықтай жеңілдей түспек. Өйткені, үнемі кептеліс болатын Рысқұлов даңғылы мен Емцов көшесіндегі жолайрықтың құрылысы 2021 жылы толық тәмамдалуы тиіс. Сондай-ақ, Сейфуллин даңғылы мен Жансүгіров көшесіндегі және Бұқтырма көшесі мен Құлжа тас жолындағы салынып жатқан жолайрық 2022 жылы пайдалануға берілмек. Ал биыл қаладағы әбден тозығы жеткен 200 шақырымды құрайтын 283 көшеге жаңадан асфальт төселініп бітеді дейді мамандар. Оның 177 көшесі қаланың шеткі аудандарында екен.
НҰРЗАТ ОРДАБАЕВ, Алматы қалалық Мобильділік басқармасының бөлім басшысы:
– Қала бойынша орташа жөндеу жұмыстары 30-шы қарашада бітіруге жоспар қойып отырмыз. Оны бітіреміз. Қазір қала бойынша 12 мердігер компания істеп жатыр. 3 жылдың ішінде жолда қандай да бір ақаулар болса онда олар өз қаражаттарына бәрін реттей береді.
Бұдан бөлек, жыл басынан бері Алматыдағы 35 шақырымдық 144 көшеге жаңа жолдар салыныпты. Әлі желтоқсан айының соңына дейін ұзындығы 13 шақырымға жуық 33 көшеге жол салу жоспарланған. Оның ішінде Алатау ауданындағы Өжет, Ұлжан, Шаңырақ, Әйгерім, Дархан-Байбесік, Трудовик, Алғабас, Қарасу, Көк-Қайнар, Ақбұлақ, Саялы-2 және де Жас Қанат ықшам аудандарында жаңа жолдар салынуда.
АСАН БОСТАНОВ, Алматы қалалық Мобильділік басқармасының бөлім басшысы:
– Ағымдағы жылдың соңына дейін Алатау ауданында 75 шақырымды құрайтын 306 көшенің жолын салып бітіреміз. Ал келесі жылы бұл ауданның 3 шағын ауданындағы 141 көшеге 22 шақырым жол төселінеді. Ол-« Өжет», «Самғау», «Шаңырақ-5» шағын аудандары.
Ал 122 мың тұрғыны бар Алатау ауданыдағы Әйгерім-1 мен 2, Шаңырақ-2 мен Ұлжан-1, сондай-ақ, Дархан-Байбесік ықшамаудандарындағы жолдардың бір бөлігі толықтай пайдалануға беріліпті.
Әйгерім Ердәулет, Думан Сүлейменов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Алматыдағы көлік қозғалысы келер жылдан бастап айтарлықтай жеңілдей түспек канала Информбюро 31