«Словы мацней» – Лэслі Найф /Вацлаў Ластоўскі

У новым роліку відэапраекта «Словы мацней» музыка і фронтмэн гурта Gods Tower Лэслі Найф чытае верш Вацлава Ластоўскага «Чала я не хiлiў прад сiлай».

Лэслі Найф (Уладзіслаў Наважылаў) — музыка, вакаліст. У 1989 годзе ў Гомелі заснаваў гурт Chemical Warfare, які ў 1992-м стаў называцца Gods Tower, што лічыцца многім экспертамі найлепшым гуртом метал-сцэны Беларусі і адным з найлепшых беларускіх гуртоў 1990-х наогул. Падчас запуску папярэдняй электаральнай прэзідэнцкай кампаніі ў 2014-м іранічна заявіў пра сваё жаданне балатавацца ў прэзідэнты: «У нас будуць найбольшыя ураджаі, межгалактычныя трактары і Вялікі хакейны калайдар!». У 2020-м быў даверанай асобай прэтэндэнта ў прэзідэнты музыкі Алеся Таболіча. 19 верасня 2020 года быў затрыманы разам з музыкам Аляксандрам Памідоравым пасля канцэрту ў раёне мінскай вуліцай Ангарскай для мясцовых жыхароў. Змешчаны ў ізалятар на Акрэсціна, асуджаны на 8 сутак арышту, якія адбываў у акрэсцінскім і жодзінскім ізалятарах.

Вацлаў Ластоўскі (1883-1938) — палітык, пісьменнік, кнігазнаўца, этнолаг, гісторык. Аўтар першай «Кароткай гісторыі Беларусі» (1910), першай «Гісторыі беларускай (крыўскай) кнігі» (1926), рэдактар часопіса «Крывіч» і зборніка «Вянок» Максіма Багдановіча. Сакратар рэдакцыі «Нашай Нівы», кіраўнік «Беларускай Кнігарні» і Беларускага Выдавецкага Таварыства ў Вільні. Другі старшыня Рады міністраў БНР (1919-1922). Складальнік «Падручнага расейска-крыўскага слоўніка». Дырэктар Беларускага дзяржаўнага музея і акадэмік АН БССР. Паэт, празаік, літаратурны крытык, перакладчык. Рознабаковы талент эпохі «Нашай Нівы». Разам з сотнямі дзеячаў беларускай культуры ў 1930 годзе быў арыштаваны па сфабрыкаванай справе «Саюза вызвалення Беларусі», якая ў НКУС мела загаловак «Справа В. Ю. Ластоўскага і інш.» У 1931 годзе прыгавораны да 5 гадоў высылкі ў Саратаў, дзе працаваў у аддзеле рэдкай кнігі Саратаўскага ўніверсітэта. Паўторна арыштаваны 20 жніўня 1937. Ваеннай калегіяй Вярхоўнага суда СССР 23 студзеня 1938 прыгавораны да расстрэлу «як агент польскай разведкі і ўдзельнік нацыянал-фашысцкай арганізацыі». Ахвяра сталінскага тэрору.

https://budzma.by/news/slovy-macniej-9.html.html

Видео «Словы мацней» – Лэслі Найф /Вацлаў Ластоўскі канала Будзьма Беларусамі!