Үш жастағы қыз баланың мәйіті ойылған мұздың астынан шыққан

Алматы облысының Теректі ауылында "ұрланды" деген хабардан соң бүкіл ауыл-аймақ іздеген бүлдіршіннің жансыз денесі табылды. Үш жастағы қыз баланың мәйіті ойылған мұздың астынан шыққан.
Күні кеше ғана үш жастағы Надежда Белогонова аға-әпкесімен ойнап, жүгіріп жүретін аулада тірі жан жоқ. Құлауға жақын үйдің есігіне қара құлып салыныпты. Тез тіл табысып кететін ерке тотай қыздың енді жоқтығына көршілері де сенер емес. Ал қайғылы оқиғадан соң, қожайындардың қайда кеткенінен ауыл тұрғындары да хабарсыз болып шықты.
НИНА АБДУЛЛИНА:
Отбасының әлеуметтік жағдайы жақсы емес. Аналары аздап ұрттайтын ақтан. Балалар өз күндерін өздері көріп, бар тамақты тауып жейтін. Үлкен ұлы жазда апталап үйде болмайды. Ешкім іздемейтін де. Ал кішкентай қыздары өте нәзік еді. Барлығы оны оралмандар ұрлап кетті деді. Бірақ біз бір қиын жағдайдың болғанын сездік.
Алғашқы күні бүлдіршінді бүкіл ауыл болып іздеген. Тіпті кейбірі баланы шын мәнінде ұрлады дегенге сеніп келген. Ал анасы қызының жоғалып кеткендігін айтып, көмек сұрап тәртіп сақшыларына тек екінші күні барыпты.
АҚЖАН ҚҰДАЙБЕРГЕНОВ, Теректі ауылының тұрғыны:
Бізге ауданнан іздеңдер деді. Біз іздедік. Қарамаған жеріміз қалмады. Табылмаған соң, төтенше жағдай қызметкерлері мен тағы мамандар келді. Біреу өзеннен іздеу керек деген соң, сонда барсақ, қызымыз сол жерде жатыр.
Үш жастағы Надяның мәйіті жергілікті өзендегі ойылған мұзда жатқанын оның өгей әкесі айтқан. Бірақ даурығып жүрген жұрт, ақпаратты нақты кім айтқанына аса мән бере қоймағандықтан, оны күдікті деп те ойламаған. Бүлдіршінді аяусыз, айуандықпен өлтірді деген күдікпен ұсталған өгей әкенің айтуынша, Надя қайта-қайта кіші дәретке отырып қоя беріп, киімін былғай берген. Ақыры қатты ашуланған азамат, баланы өлімші етіп сабап, төсекке жатқызып қояды. Ал үй ішіндегілер ұйқыға кеткенде қызының денесін өзенге апарып тастаған. Қазір жазықсыз баланың өмірін қиған күдікті ұсталып, уақытша тергеу абақтысына қамалды.
КӨБЕЙХАН НҰРАХМЕТ, Алматы облысы ІІД баспасөз қызметінің жетекшісі қызметін атқарушы:
Тергеу аяқталғанша Надяның алты және он екі жастағы апайы мен ағасы жетімдер үйінде болады. Ал прокурорлар, жергілікті тиісті органдардың неліктен әлеуметтік жағдайы нашар отбасынан шыққан балалармен айналыспағандығын анықтайтын болады.
Лимара Салих.

Видео Үш жастағы қыз баланың мәйіті ойылған мұздың астынан шыққан канала Информбюро 31