YƏHUDİLƏRİN MİLLİ BAYRAMI TƏNTƏNƏLİ QEYD OLUNUR

Qubada yəhudilərin azadlıq və bahar mənasını verən Pesax bayramı təntənəli şəkildə qeyd olunub. Bu məqsədlə Qubadakı Heydər Əliyev adına mədəniyyət və istirahət parkında təntənəli bayram tədbiri keçirilib. Bayrama qatılanlar rayonda yaşayan dağ yəhudilərinin və başqa azsaylı xalqların adət-ənənələri, folkloru, milli yeməkləri ilə tanış olmaq imkanı qazanıblar.
Mərasimdə bildirilib ki, Qubadakı Qırmızı qəsəbədə 3 mindən çox dağ yəhudisi yaşayır. Rayonda 60-a yaxın məscid, yəhudilərə məxsus iki sinaqoq və dini icma fəaliyyət göstərir. Qeyd olunub ki, burada doğulan, hazırda isə xarici ölkələrdə yaşayan dağ yəhudilərinin müqəddəs Pesax bayramını Vətəndə qeyd etmələri artıq ənənəyə çevrilib.
Qırmızı qəsəbədəki İsak Xanukov adına 1 nömrəli məktəbdə təhsil alan azərbaycanlı və yəhudi uşaqların birlikdə ifası bayram tədbirinə əlavə rəng qatıb. Məktəblilər yəhudi nəğmələrini, eləcə də dünya şöhrətli Müslüm Maqomayevin “Azərbaycan” mahnısını böyük məharətlə ifa ediblər.
Bu il Pesax bayramı Qırmızı qəsəbədə aprelin 10-dan başlayaraq qeyd olunur və 8 gün davam edir. Təntənəli şəkildə keçirilən bayram günlərində müxtəlif dini ayinlər icra olunur. Həmçinin dağ yəhudiləri səhər və axşam saatlarında sinaqoqa gedib ibadət edirlər. Pesax bayramı aprelin 17-dək davam edəcək.
Azərbaycan dünyanın nadir müsəlman ölkəsidir ki, burada yəhudilərin milli və dini bayramları yerli camaatla birlikdə təntənəli şəkildə qeyd olunur. Müxtəlif dini inanclara məxsus insanların yaşadığı Azərbaycanda heç vaxt dini zəmində münaqişə yaşanmayıb.

Видео YƏHUDİLƏRİN MİLLİ BAYRAMI TƏNTƏNƏLİ QEYD OLUNUR канала CBC TV Azerbaijan