Маңғыстау облысында 100 млн жыл бұрын тіршілік еткен плезиозавр табылды

Ғалымдар тасқа айналған плезиозаврдың бор дәуірінде жер бетін алып жатқан Тетис мұхитында өмір сүргенін анықтады.

Бауырмен жорғалаушының сүйегін Маңғыстау ауданында кен қазып жүрген жұмысшылар тауып алған. Облыстық тарихи-өлкетану музейінің қызметкерлері оны қазып алып, мұражайға алып келді. Ресейдегі палеонтологиялық институттың ғалымдарын шақыртып, алғашқы сараптама жасалды. Табылған қаңқаның өте ертеде, бор дәуірінде тіршілік еткен плезиозавр екендігі анықталды.

Бұл – 100 млн жыл бұрын өмір сүрген алып теңіз жануарының омыртқасы. Тасқа айналған қаңқа әжептеуір ауыр. Айтпақшы, бұл жануардың салмағы 10 пілдей, ал ұзындығы 12 метрдей болған екен.

Жануар сүйегі ғасырлар бойы барқан құмның түбінде жатқандықтан жақсы сақталған. Бұл зерттеу жұмыстарының сәтті жүргізілуіне мүмкіндік берді.

Анар Қуанышева, облыстық тарихи-өлкетану музейінің бөлім меңгерушісі:

- Маңғыстауды жұмбақ жайлап, «аңыз өрген Маңғыстау» деп айтуы тегін емес. Бұдан да үлкен, бұдан да ірі жануарлардың табылуы әбден мүмкін. Ғалымдар зерттесе, палеонтолог ғалымдар келсе, ақшалай көмек бөлінсе. Сол себепті әлі де жануарлардың қаңқасы табылады деген сенімдеміз.

Жануар қаңқасының тек ортаңғы бөлігі, омыртқасы ғана бар. «Әлі мойны мен құйрығын табу керек», – дейді мұражай қызметкерлері. Олар елімізде жануарлардың осы түрін зерттейтін мамандардың тапшылығына байланысты ресейлік ғалымдардан көмек күтіп отыр. Алдағы күзде әлгі табылған аумақта кешенді қазба жұмыстары басталмақ. Алып жануардың барлық бөлігі түгенделген соң, жұртшылық осыдан 100 млн жыл бұрын тіршілік еткен бауырмен жорғалаушының қандай болғанын көріп, тамашалай алады.

Авторлары: Гүлмира Әбішева, Ренат Досалиев

Видео Маңғыстау облысында 100 млн жыл бұрын тіршілік еткен плезиозавр табылды канала Khabar NEWS - Жаңалықтар, ақпараттық бағдарламалар