Ресейлік көлік тізгіндеген азаматтар төртінші күн наразылыққа шығып жатыр

Ресейлік нөмермен жүрген жүргізушілердің наразылығы бүгін Ақтөбеде жалғасты. Облыстық әкімдіктің алдына жиылған жүзге жуық тұрғын билік қысымға ала бермей, мәселені халыққа ыңғайлы етіп шешудің жолын тапсын деп отыр. Өйткені Ресейден әкелінген темір тұлпарларды Қазақстанда тіркеуге ақшамыз жетпейді дейді олар. Бұдан бөлек, жүргізушілер көліктерін көшеде тоқтата салып, жаппай айып тұрағына қойып жатқан полицейлерге де өкпелі.
Нұржан Сатаев көлігін бір жыл бұрын Ресейден арзанға сатып алған. Сондықтан, маңдай термен тапқан ақшама әкелген көлігімді ешкімнің тартып алуына жол бермеймін дейді. Сөзінше, күні кеше көшеде полицейлер тоқтатып, машинасын айып тұрағына апармақ болыпты.
НҰРЖАН САТАЕВ, көлік жүргізушісі:
– Тимесін машиналарға! Олар неге тиеді? Менің сатып алған машинама неге тиеді? Мен оған ақша төледім. Олардың қандай хақысы бар алып кетуге? Біздің машинамызды көрдіңіз ба, салонда қанша тұратынын? Екі есе, екі есе қымбат. Мен мысалға простой адам, я не могу позволить себе.
Жиналғандар Ресей көліктерін бастапқыда шекарадан еш шектеусіз кіргізіп алып, қазір тексеруге алған биліктің әрекетіне наразы. Айтуларынша, елге еркін кірген темір тұлпарларды мемлекеттік тіркеуге қоюға шамалары жетпейді. Өйткені кедендік рәсімдеудің өзіне көліктің екі есе бағасы кетеді дейді.
БАҚЫТЖАН ҚҰРМАНОВ, көлік жүргізушісі:
– Біздің талабымыз утильсбор кетсін. Және де қазір кіріп, қолдарында страховкасы бар көліктерге бесплатно регистрация жасалсын. Страховкамен кірді ме онда мемлекет оларды кірген көлік ретінде және страховка берген адамын соның иесі ретінде мойындады деген сөз. Заң солай ғой. Болмаса біз Россиямен шекараласпыз ба, Россияның процентый ставкасына дейін түссін.
Қазір Қазақстанда Ресейден әкелінген екі жүз мыңнан астам көлік бар. Соның 10 641-і Ақтөбе облысында. Полицейлер сол Ақтөбеде жүрген он мыңнан аса көліктің не Ресейде, не Қазақстанда тіркеуде жоқ екенін айтады. Оның үстіне жиі болатын жол көлік оқиғаларына да осы өзге елдің нөмерімен жүрген көліктер себеп дейді.
АЙДОС ҚОЛЖАНОВ, Ақтөбе қалалық полиция басқармасы басшысының орынбасары:
– Ресей Федерациясынан сатып алынған автокөлік тіркеуден шешілетін болса, ол он күннің ішінде Ақтөбе облысында, Қазақстанда тіркеуде болу керек. Он күннің ішінде қою керек. Егер де ол тіркеуде болмаған жағдайда, он күннен асып кететін болса, ол автокөліктің жүруіне тыйым салынады.
Полицейлер қазір ресейлік көліктерді анықтау үшін арнайы рейд жүргізіліп жатқан жоқ деп отыр. Ал жүргізушілер өткен жылы Армениядан әкелінген көліктерге сары нөмер беріп жеңілдік жасаған билік, бізге де сондай көмек қарастырсын немесе мемлекеттік тіркеуді қара халықтың қалтасы көтеретіндей арзандатсын деп отыр.
Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ЕАЭС #көлік #ресей #РФ #РФ_учет #РесейКөліктері #айыппұл

Видео Ресейлік көлік тізгіндеген азаматтар төртінші күн наразылыққа шығып жатыр канала Информбюро 31