Ի՞նչ տեղի ունեցավ 1996-ի սեպտեմբերի 25-ին

1996-ի սեպտեմբերի 22-ին կայացան ՀՀ նախագահի ընտրություններ: Սեպտեմբերի 25-ին ընդդիմությունն Ազատության հրապարակում հանրահավաք էր հրավիրել, որն ավարտվեց ԱԺ շենքի վրա գրոհով:

«Այսօր ամեն ինչ որոշվելու է: Սա մեր հայրենիքն է... կվերցնենք և՛ էս շենքը, և՛ էն մյուս շենքը, բայց էդ ամեն ինչը պետք ա կատարվի կազմակերպված ձևով»,- հանրահավաքում ասում է Վազգեն Մանուկյանը: Նա ասում է, որ բոլորով գնում են ԿԸՀ (որն այդ ժամանակ տեղակայված էր ԱԺ շենքում), պահանջելու, որ յուրաքանչյուր մարզից 3-ական արկղ բացվի և ստուգվի: «Եթե 20-30 րոպեից չգանք՝ եկեք մեր հետևից»,- իր ելույթը եզրափակում է Վազգեն Մանուկյանը:

Ժողովուրդը նրա առաջնորդությամբ շարժվում է դեպի ԱԺ շենք: Մանուկյանը մտնում է ներս և դուրս չի գալիս ո՛չ 20, ո՛չ 30, ո՛չ էլ 40 րոպե անց: ԱԺ դարպասների մոտ Վ. Մանուկյանի զինակիցներից Դավիթ Վարդանյանը բարձրախոսով հայտարարում է, որ եթե առաջիկա րոպեներին Վ. Մանուկյանը դուրս չգա, «ապա մենք համարելու ենք, որ նա ձերբակալված է, և ձեռք ենք առնելու համապատասխան միջոցներ»:
Ելույթ է ունենում Պարույր Հայրիկյանը, ով ասում է, որ թեև, ըստ իշխանության, օրենքը հնարավորություն չի տալիս կատարել ընդդիմության պահանջը, սակայն օրենքը «ենթադրում է նման բան»:
Կրքերը թեժանում են, ցուցարարները մտնում են ԱԺ տարածք:

ԿԸՀ գրասենյակից դուրս է գալիս Վազգեն Մանուկյանը, ով հենց ԱԺ շենքում հայտարարում է, որ «հանձնաժողովը որոշում է ընդունում, որը մեզ լրիվ գոհացնում է...: Մենք դուրս կգանք, կսպասենք: Եթե որոշումը չընդունեն, էլի հետ կգանք»:

Իրավապահները լուսարձակող փամփուշտներով օդային կրակահերթ են սկսում: Գործի են դրվում ջրցան մեքենաները: Ժողովուրդը վերադառնում է Ազատության հրապարակ:

«Ով այսօր մեզ հետ չէ, նա հայ չէ»,- ասում է Պարույր Հայրիկյանը: «Նա, ով ձեզ հետ չէ, նա մեր թշնամին է»,- շարունակում է հաջորդ բանախոսը:

«Կրակոցներ կային, բայց օդի մեջ էին կրակում...: Զինվորները, իմ ունեցած տեղեկություններով և իմ տեսածով, իրենց շատ նորմալ են պահել: Մենք արյուն թափող չենք: Մենք ցույց տվեցինք մեր վճռականությունը: Եղավ և՛ ճիշտ, և՛ սխալ, բայց մեր վճռականությունը ցույց տվեցինք»,- Ազատության հրապարակում հայտարարում է Վազգեն Մանուկյանը:

Ցուցարարներն ԱԺ շենքում ներխուժել էին ԱԺ նախագահի աշխատասենյակ, ծեծել ու պատանդառել ԱԺ նախագահ Բաբկեն Արարքցյանին ու փոխնախագահ Արա Սահակյանին: Հետագայում հիվանդանոցում Արարքցյանը պատմել է, թե ինչպես է սենյակ մտած մարդկանց առաջնորդող Արշակ Սադոյանն իրենց տեսնելով ասել. «Ահա նրանք, արեք նրանց հետո ինչ ուզում եք»:

1998-ի նոյեմբերին «Մարդու ժամանակը» հաղորդման հյուր ՆԳ նախկին նախարար Վանո Սիրադեղյանի խոսքից պարզ է դառնում, որ պետք է լիներ ընտրության երկրորդ փուլ, որը սակայն տեղի չունեցավ:

Պաշտոնական տվյալներով հենց առաջին փուլում նախագահ էր ընտրվել Լևոն Տեր-Պետրոսյանը՝ ստանալով քվեների 52%-ը: Վազգեն Մանուկյանը պաշտոնապես ստացել էր մոտ 41%:
----------------------------
Տեսանյութի աղբյուր՝ Վարդուհի Իշխանյանի ալիք - http://www.youtube.com/user/ankakhAm

Видео Ի՞նչ տեղի ունեցավ 1996-ի սեպտեմբերի 25-ին канала Armenia