Xəzər Süleymanlı-Bir zaman həmvətən idim sənə, indi VƏTƏNƏM!

şeir: Kamal Hüseynzadə
səs: Xəzər Süleymanlı
səsyazma: Nurlan Hatəmoğlu

Hökm edir ərşə bir ulduzlu hilal, seyrinə dal,
Parlasın gözlərin ulduz kimi, ey qaşı hilal.

Külə döndüm sənə olsun deyə qismət bu qürur,
Cismimi büs-bütün atəş bürüdü, ruhumu nur.

Kükrədim fırtına tək gah o yana, gah bu yana,
Qoymadım doğma səmalarda ögey yel dolana.

Can quşum tərk eləyincə bədənin dar qəfəsin,
Elədim aləmi dar düşmənə, kəsdim nəfəsin.

Tutduğum zirvədən ötrüydü həyata gəlişim,
Kəsə getdim yolumu, qalmadı dünyada işim.

Mən bəqa aşiqiyəm, yoxdu fənalıqla aram,
Almışam aləmi ağuşuma, hər yerdə varam.

Ocağın sönsə odam mən, evin od tutsa suyam,
Səndən ayrılmamışam, hər nə görürsənsə, oyam.

Ruhumun qüdrəti ruhundadı, dik tut başını,
Ağlama, saxla zəfər müjdəsinə göz yaşını.

Qoyma nəm çəkməyə kirpiklərini, qeydinə qal,
Qalxıb innən belə xəzri saçına çəksə sığal,

Əyilib öpsə üzündən gilavar bil ki, mənəm,
Bir zaman həmvətən idim sənə, indi VƏTƏNƏM!

#xezersuleymanli #xəzərsüleymanlı

Видео Xəzər Süleymanlı-Bir zaman həmvətən idim sənə, indi VƏTƏNƏM! канала Xəzər Süleymanlı