Ерлан Сағадиев: Оқушының үй тапсырмасы азаяды

Үй жұмысының аз не көп берілуі баланың оқу үлгеріміне еш әсер етпейді. Ондай болса, ұстаздың жұмысын ұлғайтып, оқушының миын қосымша тапсырмалармен жүктеудің қажеті не?

Сауалдың шешімі бір ай ішінде шығатын болды. Министр Ерлан Сағадиев бұл мәселемен қазір арнайы топ айналысып жатқанын айтты.

Ерлан Сағадиев, ҚР Білім және ғылым министрі:

-Біздің оқушылар үй жұмысын орындау уақыты бойынша 65 мемлекеттің ішінде 4 орынды алып отыр. Үй жұмысының көлемі мен білім жетістіктері арасында тура ара-қатынас жоқ. Үлкен топ құрып, сол жұмыс басталды. Қазір екі нұсқа ұсынылады. Ең бірінші, үй жұмысын барлық пәндер бойынша азайтып беру немесе үй жұмысын кейбір пәндер бойынша ғана беру. Бір айдың ішінде бір шешімге келу керек.

Жұрағат Баман, тілші:

-Әлеуметтік желілерде әліппе туралы әңгіме көп айтылды. Барша жұрт әріп үйренген оқулық бірінші сынып бағдарламасынан алынып тастала ма деп, дал болғанын білеміз.

«Алайда алаңдаудың реті жоқ», – дейді министр. Айтуынша, бүгінде мектеп табалдырығын алғаш рет аттайтын балдырғандардың басым бөлігі әріп таниды. Яғни үйде үйренген. Сондықтан педогогтардың ұсынысы бойынша әліппені нөлінші сыныпқа қалдырып, ал ана тілі кітабын бірінші класстан бастап беруді жөн көрген.

Ерлан Сағадиев, ҚР Білім және ғылым министрі:

-Нөлінші сынып қазіргі уақытта не үшін қажет? Балалардың жүз пайызы мектепке келгенде бәрі дайын болуы керек. Қазіргі уақытта 80 пайыз балалар оқи алады, әріптерді таниды. 20 пайыз балалар әріптерді танымай, класс оны қайталап, мұғалімдерге қиын болып отыр. Қазіргі уақытта әліппе, букварь қайда кетті деп отыр ғой? Сол нөлінші сыныпты сол үшін дайындадық. Биыл ол пилот ретінде енгізіледі.

Жұрағат Баман, тілші:

-Әліппені оқыттық, әріпті таныттық дейік. Енді баланың сөйлеу қабілетін дамыту қажет. Дәл айтсақ, өз қазақ тілінде.

Министрдің сөзінше, бүгінде оқушылардың 90 пайызы мемлекеттік тілді мектептерде білім алады. Бірақ белгісіз себептермен қазақша дұрыс сөйлеу білмейді.

Олқылықтың алдын алу үшін биылдан бастап, білім ордаларында қазақ тілінде кәдімгідей сөйлеуді үйрететін жаңа әдістеме енгізіледі.

Ерлан Сағадиев, ҚР Білім және ғылым министрі:

-Аса назар аударатын проблемалардың бірі орыс мектептерінде 500 мың балалар қазақша 11 жыл мектепте оқыса да, сөйлемейді. Оларды сөйлету керек. Жаңа әдістеме бізде дайын. Биыл жаңа жылдан бастап оны пилот ретінде енгіземіз. 150 мектеп бар. Бәрі дұрыс болса, 2018-19 жылдан бастап әр мектепке енгізе бастаймыз.

Жұрағат Баман, тілші:

-Қазақ тілімен қатар ағылшын тілін үйрету де дамиды. Қазір елде 2700-ден астам педогог ағылшынша дәріс беріп жатса, қатарларына биыл 12 мың және келер жылы 12 мыңға жуық ағылшынды меңгерген мұғалім қосылуы керек.

Видео Ерлан Сағадиев: Оқушының үй тапсырмасы азаяды канала Khabar TANYM