Министрлік қолға алған «Е-құрылыс» жобасы елдегі баспана бағасын арзандата ала ма?

Еліміздің Индустрия министрлігі қолға алған «Е-құрылыс» жобасы бағаны бақылауда ұстай алмайды. Бұл бағдарлама тек құжаттарды сандық форматқа ауыстырумен ғана шектеледі дейді Қазақстанның құрылысшылар одағының төрағасы. Сондықтан, Үкіметке тұрғын үй бағасын тұрақтандыратын өзге жобаға көшу тиімді деп отыр. Ал министрлік өкілдері, дәл осы бастаманың арқасында кәсіпкерлер үйдің құнын аспандатып жібере алмайтынына сенімді.
Бұдан былай құрылыс компаниялары түгел «Е-құрылыс» бағдарламасы аясында жұмыс істеуге көшеді деген Индустрия министрлігі, бұл бастама баспана бағасына айтарлықтай әсер етеді деп отыр. Өйткені, қазандықтың қазылған сәтінен бастап, тұрғын үйге кеткен материалдар, сондай-ақ құрылыс барысы цифрланады. Яғни, видео нұсқада жүргізіледі. Бастысы сараптамадан өткен жобалық- смета сандық форматта енгізіледі. Ол жерде жалпы құрылыс сметасының шекті құны республика бойынша бірдей көрсетіледі. Яғни, бағаны одан асыруға жол берілмейді.
БАҚЫТЖАН КАЧАКОВ, ҚР ИИДМ құрылыс және ТКШ істері комитеті төрағасының орынбасары:
– Әрбір нарықтағы жеке кәсіпкер өзі біледі ғой қаншадан сатқысы келетінін. Бірақ біз оның қаншадан екенін біліп отырамыз. Егер біз сол халыққа айтсақ сатып алып отырған үйіңіз 2-3 есе қымбат деп айтсақ, әрине кәсіпкер бағасын түсіре бастайды.
Бірақ, мұнымен Қазақстанның құрылысшылар одағының төрағасы Талғат Ерғалиев келіспейді. Өйткені, Үкіметтің қолжетімді баспанаға деп бөлетін қаражаты дер кезінде мердігерлердің қолына жетпейді. Ақшасы аз, уақыты тығыз компания соңында сапасыз үйді салып, әкімдікке өткізе салатынын айтады. Сондықтан, басқа бастаманы іске қосқан ұтымды дейді.
ТАЛҒАТ ЕРҒАЛИЕВ, Қазақстан құрылысшылар одағының төрағасы:
– Ең біріншіден Үкімет нарықта салынып жатқан үйлерді сатып алуы тиіс немесе өзі жаңағы белгілі жоба не болмаса конкурс арқылы салынып жатқан сол меншіктерден сатып алуы тиіс үлкен салынып жатқан ғимараттардан. Конкурсқа қатынасып, шартқа тұрып, одан үйлер сапалы болады, сонда өзі жаңағы салып жатқан құрылыс мекемесі өздері сол үйге жауап береді.
Тұрғын үй бағасы барлық өңірде өседі деген Талғат Ерғалиев, "Е-құрылыс" тек құжаттарды цифрлап қоюмен шектелетінін айтты. Ал Министрлік тарапы дәл осы жоба "сапасыз құрылыс" деген ұғымды да жоюға әсер етеді деп отыр. Ал 2025 жылға қарай елімізде құрылысқа қажетті материалдар шығаратын 35 кәсіпорын іске қосылмақ. Индустрия министрлігі, баға ол кезде тағы түседі деп топшылап отыр.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Е_Құрылыс#баспана #нарық

Видео Министрлік қолға алған «Е-құрылыс» жобасы елдегі баспана бағасын арзандата ала ма? канала Информбюро 31