សង្ខេបព័ត៌មានអន្តរជាតិសំខាន់ៗ ប្រចាំថ្ងៃទី៣ ខែកក្កដា ឆ្នាំ២០២៥

—-
១. អ្នកនាំពាក្យកងទាហានថៃ នៅថ្ងៃពុធ ទី២ ខែកក្កដា បានព្យាយាមបន្ធូរបន្ថយក្តីបារម្ភរបស់សាធារណជនថៃ បន្ទាប់ពី Google Maps បានកំណត់ទីតាំងប្រាសាទតាមាន់ធំថាស្ថិតនៅក្នុងព្រំដែនរបស់ប្រទេសកម្ពុជា ដែលបង្កឱ្យមានការភ័យខ្លាចថាថៃអាចនឹងបាត់បង់ទីតាំងនេះ និងដែនដីជុំវិញ។ នេះបើតាមការចុះផ្សាយរបស់កាសែតថៃ។ អ្នកនាំពាក្យកងទាហានថៃ ឧត្តមសេនីយ៍ វិនថៃ សុវារី(Winthai Suvari) បាននិយាយថា ព្រំដែនដែលបង្ហាញនៅលើ Google Maps មិនមានទម្ងន់ផ្លូវច្បាប់ទេ។ ានប្រាប់ឱ្យពលរដ្ឋថៃ រាយការណ៍ (report) ទៅ Google Maps ដើម្បីឱ្យកែប្រែចំណុចនេះផងដែរ។ សូមបញ្ជាក់ថា បន្ទាប់ពីជម្លោះព្រំដែនរវាងកម្ពុជា-ថៃ កាលពីថ្ងៃទី២៨ ឧសភា, កម្ពុជាបានសម្រេចដាក់ពាក្យបណ្តឹងទៅតុលាការយុត្តិធម៌អន្តរជាតិ(ICJ) លើតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។ ប៉ុន្តែប្រទេសថៃបានឆ្លើយតបដោយបញ្ជាក់ថា ទីតាំងទាំង៤នេះ ស្ថិតនៅក្នុងទឹកដីថៃ និងបានប្រកាសថាមិនទទួលស្គាល់យុត្តាធិការរបស់ ICJ ក្នុងករណីនេះទេ។
ប្រភព៖ The Nation (https://www.nationthailand.com/news/asean/40052042)

២. សមាជិកគណៈរដ្ឋមន្ត្រីថ្មីរបស់ប្រទេសថៃបានស្បថចូលកាន់តំណែង នៅថ្ងៃព្រហស្បតិ៍ ទី៣ ខែកក្កដានេះ ដែលក្នុងនោះ មានទាំងនាយករដ្ឋមន្ត្រីដែលត្រូវបានព្យួរពីតំណែង និងកំពុងស្ថិតនៅក្រោមការស៊ើបអង្កេតខាងក្រមសីលធម៌ ក្រោយការបែកធ្លាយកិច្ចសន្ទនាជាមួយប្រធានព្រឹទ្ធសភាកម្ពុជា សម្តេចតេជោ ហ៊ុន សែន។ នៅក្នុងបញ្ជីគណៈរដ្ឋមន្ត្រីថ្មីនេះ លោកស្រី ផែថងថាន នឹងក្លាយជារដ្ឋមន្ត្រីក្រសួងវប្បធម៌។
នាយករដ្ឋមន្ត្រីស្តីទី លោក Suriya Jungrungreangkit បានដឹកនាំសមាជិកគណៈរដ្ឋមន្ត្រីថ្មី ចូលរួមក្នុងពិធីស្បថចូលកាន់តំណែងនេះ នៅចំពោះព្រះភក្រ្តព្រះមហាក្សត្រថៃ មហាវជិរាឡុងកន។ ក្រោយមក លោក Suriya នឹងប្រគល់ភារកិច្ចជានាយករដ្ឋមន្ត្រីស្តីទីជូនលោក ភូមិថាំ វេឆាយ៉ាឆៃ ដែលបានស្បថចូលកាន់តំណែងនៅថ្ងៃព្រហស្បតិ៍នេះ ជាឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ។ សូមបញ្ជាក់ថា កន្លងមក លោក ភូមិថាំ គឺជាឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ ពោលគឺតាំងពីពេលដែលលោកស្រី ផែថងថាន ចូលកាន់តំណែងកាលពីឆ្នាំមុន។
ប្រភព៖ AP (https://apnews.com/article/thailand-cabinet-paetingtarn-shinawatra-ethics-investigation-b9ab9dc0e39e52c4a27c4300c07f1d86)

៣. លោក Maris Sangiampong រដ្ឋមន្ត្រីក្រសួងការបរទេស បានថ្លែងនៅថ្ងៃព្រហស្បតិ៍ ទី៣ ខែកក្កដានេះ អំពីស្ថានភាពព្រំដែនថៃ-កម្ពុជា ដោយបញ្ជាក់ថាភាពតានតឹងបានថយចុះខ្លះ ដោយមិនមានការប៉ះទង្គិចគ្នា ប៉ុន្តែនៅតែមានវត្តមានកងទ័ព និងសព្វាវុធនៅតាមបណ្តោយព្រំដែន។ នេះបើតាមការចុះផ្សាយរបស់សារព័ត៌មានថៃ Khaosod ។ ប្រមុខការបរទេសថៃបញ្ជាក់ថា រដ្ឋាភិបាលថៃ មានបំណងចង់ឃើញមានការកាត់បន្ថយកម្លាំង នៅតាមតំបន់ផ្សេងៗ ដើម្បីឱ្យស្ថានភាពនៅតាមទីតាំងទំាងនោះ ត្រលប់ទៅរកភាពធម្មតាវិញ ដូចក្នុងឆ្នាំ២០២៤ ខណៈរដ្ឋាភិបាលថៃ មានការព្រួយបារម្ភអំពីសុវត្ថិភាពរបស់ប្រជាជន នៅតំបន់នោះ។ គួរជម្រាបជូនថា ភាពតានតឹងតាមព្រំដែនកម្ពុជា-ថៃ បានផ្តើមឡើងចាប់តាំងពីថ្ងៃទី២៨ ខែឧសភា ជាពេលដែលកងទាហានថៃ បានចូលមកបាញ់ប្រហារលើភាគីកម្ពុជាបណ្តាលឱ្យយោធាកម្ពុជាម្នាក់បាត់បង់ជីវិត។ ក្រោយមកថៃបានដាក់ចេញវិធានការជាបន្តបន្ទាប់ គឺការបិទច្រក ឬកែសម្រួលពេលវេលានៃការបិទច្រកព្រំដែនដោយឯកតោភាគី៕
ប្រភព៖ Khaosod English (https://www.facebook.com/photo?fbid=1201055825400257&set=a.366191288886719)

Facebook: https://web.facebook.com/preah.khan.khmer
Telegram: https://t.me/preah_khan
TikTok: https://www.tiktok.com/@preah_khan

Видео សង្ខេបព័ត៌មានអន្តរជាតិសំខាន់ៗ ប្រចាំថ្ងៃទី៣ ខែកក្កដា ឆ្នាំ២០២៥ канала ព្រះខ័ន