2020 Мысæн æмæ Намысы азы хатдзæгтæ

Уæрæсейы 2020-æм аз снысан кодтой Мысæн æмæ Намысы азæй. Æппæт бæстæйы ацыд 10 мин кадджын мадзал æмæ акцийæ фылдæр. Нæ республикæйы дæр бæрæгбоны мадзæлттыл азы райдианæй куыстой. Снысан кодтой сæрмагонд пълан. Фыдыбæстæйы Стыр хæсты 75 азы боны кадæн арæзтой алыхуызон мадзæлттæ. Архайдтой дзы хæсты ветерантæ, æрыгон æфсадгæнджытæ, студенттæ, скъоладзаутæ, суанг ма рæвдауæндæтты хъомылгæнинæгтæ дæр. Программæйы хатдзæгтæ сæмбырд кодтам нæ дарддæры æрмæджы.

Нæ истори - нæ хæзна. Уæлдайдæр, Фыдыбæстæйы Стыр хæстимæ баст куы уа, уæд. Уæлдайдæр, ацы аз Уæлахиз 75-æм хатт куы сбæрæг кодтам, уæд. Абон дæр ма æмыр æдисæнтау мах уынæм хæсты номарæн цыртдзæвæнтæ. Ацы аз дзы бирæтыл сæвæрдтой зæрдылдарæн нысæнттæ QR-кодимæ. Æдæппæтæй уыдысты 30. Фенæн сæ ис республикæйы 7 районы. Ныр QR-коды фæрцы базонæн ис цыртдзæвæнты æппæт истори дæр. 

Уæвгæ, цыртдзæвæнты тыххæй кæмæн цы дзуринаг сты, уыдон сæм хъуамæ хъусой. Уый тыххæй æгас афæдз дæр республикæйы хæстæфхæрд бынæттæм арæзтой экскурситæ, райдай Дзæуджыхъæуы Намысы мемориалæй æмæ фæу суанг Елхоты монументæй. Æрмæст Барбашовы номхæссæг мемориалон фæзы уындæй адæймаджы буар ауырынгтæ вæййы. Мидисджын экскурситæ скъоладзаутæн æмæ студенттæн арæзта æхсæнадон организаци «Комсомол Осетии». Фæсивæды зонгæ кодтой хæсты истори æмæ йæ хъайтартимæ.

«Барбашовы фæз»-ы тыххæй - бæлвырддæр. Ацы аз дзы сарæзтой хъайтарты къамты рæнхъæвæрд. Æнæхъæн афæдз æм цыдысты республикæйы цæрджытæ, туристтæ, уазджытæ, скъоладзаутæ æмæ фæсивæды минæвæрттæ. Зонгæ сæ кодтой Советон Цæдисы хъæбатыр Петр Барбашовы номимæ, Фыдыбæстæйы Стыр Хæсты архайджытимæ, цæгатирыстойнаг хъæбатырты историимæ, радзырдтой сын ирон адæмы хъæбатырдзинады тыххæй.

Фыдыбæстæйы Стыр хæсты истори кæй цæстыты раз райгуырд, уыцы ветерантæм дæр уæдæ уæлдай æргом здæхтой. Социалон æгъдауæй сын æххуыс кæнынæй уæлдай ма сын-иу сæ зæрдæтæ дæр алхæдтой. Зæгъæм, ацы аз сын сарæзтой акци «Телефоны-фронтовикам», зæгъгæ. Чырæ телефонтæ æмæ лæвар дзурынæн сертификаттæ райстой 130 адæймаджы. Зæрдиагæй сыл-иу бацин кодтой.

Цæгат Ирыстоны цæрджытæн дæр фадат уыд ветераны бæллиц сæххæст кæнынæн. Сарæзтой æппæтуæрæсеон акци «Мечта Ветерана», зæгъгæ. Æдæппæттæй дзы архайдтой Уæрæсейы 50 регионы. Афтæ ма Уæлахизы 75 азы боны агъоммæ скъолаты цыдысты Хъæбатырдзинады уроктæ. Сывæллæттæ кастысты æмдзæвгæтæ, кодтой хæстон зарджытæ.

Цæстытæ доны кæмæй зилынц, зæрдæ кæмæй ныккæрзы, уыцы акци - «Блокадный хлеб», зæгъгæ. Æрымысыдысты дзы Ленинграды цæрджыты хъайтардзинад. Акцийы архайджытæ бацæттæ кодтой сæрмагонд фæйнæджытæ горæтыл æрхъулайы тыххæй, стъæлттыл равæрдтой, хæсты заманы Ленинграды цæрджытæн цы дзулы къæбæртæ лæвæрдтой, раст ахæмтæ.

Фæсивæды æфсæддон-патриотон хъомылады центры сæрмагонд мадзæлттæ дæр цыдысты пъланмæ гæсгæ. Сæ иу уыд - Уæлахизы кадджын бонмæ патриотон акци «Георгиевская ленточка», зæгъгæ. Лæвæрттой сæ республикæйы цæрджытæн. Стыр куыст бакодтой æмæ кæнынц Æппæтуæрæсеон æхсæнадон регионалон змæлд «Уæлахизы бархионтæ». Егъау бæрæгбон сси республикæйы цæрджытæн ретро-поезд «Уæлахиз»-ы ссыд дæр. Цæугæ музей баст уыд Фыдыбæстæйы Стыр хæсты 75 азы бонимæ. Республикæйы цæрджытæн æмæ уазджытæн фадат уыд хæстон азты рæстæгмæ аздæхынæн.

«Хæсты Сывæлæтты» ном чи хаста, уыцы майданæй афæдзы дæргъы хорзæхджын кодтой Фыдыбæстæйы Стыр Хæсты йæ ныййарджытæ тохы быдырмæ кæмæн ацыдысты, уыцы сабиты. Ацы аз æй æдæппæттæй саккаг кодтой 100 адæймагæн.

Уæдæ æнæзæгъгæ, нæ сæр бæрзонд кæмæй хæссæм, уыцы Уæлахизы боны тыххæй дæр. Хъыгагæн, коронавирусы аххосæй йæ ацы аз арвыстам сæрмагонд уавæрты. Кадджын бон райдыдта Æппæтуæрæсеон акци #Окна Победы-йæ, зæгъгæ. Уæлахизимæ баст мадзæлтты архайдтой куыд республикæйы хицауады уæнгтæ, афтæ хуымæтæг цæрджытæ дæр.

Хъуамæ ма сыл бафтыдаид иу. Дзанайты Азанбеджы номыл культурон фонды хъæппæрисæй ацы аз Мæскуыйы хъуамæ байгом кодтаиккой нæ номдзыд Плиты Иссæйы бюст. Уæдæй фæстæмæ йæ фенæн уыдаид, Поклонная гора, зæгъгæ, кæй хонæм, уыцы ран, Намысы залы. Фæлæ кадджын мадзал пандемийы аххосæй аргъæвын бахъуыд. Фонды уæнгтæ стыр ныфсытæ бæттынц фидæны азимæ, цæмæй нæ номдзыд хъæбатыры ном æнустæм баззайа историйы.

Уæвгæ, фидарæй зæгъæн ис, нæ истори адæмы иугæнæг фæрæз кæй у. Алчидæр хинымæры кувы уымæ, цæмæй Фыдыбæстæйы Стыр хæсты 1418 боны хуызæн иунæг дæр а-дунейыл макуыуал æрцæуа. Хæстон цæхæр кæй бинонты басыгъта, уыдоны хъысмæт хъуамæ мачиуал бавзара.
_________________________
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv

Видео 2020 Мысæн æмæ Намысы азы хатдзæгтæ канала iRYSTON TV