Каныкей ЭРАЛИЕВА: "Эрнистин үч ырына Атайбек обон чыгарды..."

Сөзү: Эрнис АСЕК уулунуку
Обону: Атайбек Бөдөшовдуку
Аткаруучу: Каныкей Эралиева

Сүйүү мунары
Тунарды дүйнө, тунарды,
Турмуштун кетти кунары,
Сүйгөнүң кетти кылчайбай,
Сүйүүнүн басты мунары.

"Сүйөм" деп айткан сөз эле,
Сүйкүмдүү караш, көз эле,
Берилбей жүргөн жүрөгүң
Берилип кетти өзү эле.

Билинбей күндөр өткөнбү,
Нөшөрдөй сезим төккөнбү,
Жактырып жүрүп байкабай
Жалганга жаштык чөккөнбү?..

Кудайдын кандай күнү эле?
Көктөмдүн эрте түнү эле,
Кош дене жаткан жаздыктар
Балапан куштун жүнү эле.

Аз өттү, балким көп өттү,
Ким билет турмуш түгөттү?!
Дүйнөдө жалгыз "Ал" болуп,
Ээледи бүткүл жүрөктү...

"Сүйбөймүн" деген сөз эле,
Сүрү сур караш, көз эле.
Жомоктой сезим заматта
Жоголуп кетти өзү эле.

Тунарды дүйнө, тунарды,
Турмуштун кетти кунары,
Сүйгөнүң кетти кылчайбай,
Сүйүүнүн басты мунары...
1994-жыл

Видео Каныкей ЭРАЛИЕВА: "Эрнистин үч ырына Атайбек обон чыгарды..." канала Алакан TV