“SİLAHLI QÜVVƏLƏR HAQQINDA” YENİ QANUN İLK OXUNUŞDA QƏBUL OLUNUB

Yenidən hazırlanan “Silahlı Qüvvələri haqqında” qanun layihəsi parlamentin iclasında ilk oxunuşda müzakirəyə çıxarılıb. Milli Məclis sədrinin 1-ci müavini Ziyafət Əsgərov bildirdi ki, hazırda qüvvədə olan “Silahlı Qüvvələr haqqında” qanun 1991-ci il oktyabrın 9-da qəbul edilib. Bu, həcmcə kiçik və o dövr üçün Silahlı Qüvvələrin hüquqi statusunu tənzimləmək baxımından lazımlı qanun idi.
Yeni qanun Azərbaycan Silahlı Qüvvələrinin təyinatı, əsas vəzifələri, idarəolunması və hərbi quruculuq məsələlərini nəzərdə tutur. Qanun layihəsi 5 fəsildən ibarətdir. Burada ilk dəfə Silahlı Qüvvələrin, ordunun anlayışı və digər qoşun birləşmələrinin anlayışı verilir.
Qanun layihəsinin ilk oxunuşda müzakirələri zamanı millət vəkili Qüdrət Həsənquliyev bildirdi ki, Milli Məclis Silahlı Qüvvələrə nəzarət etməlidir. Heç bir halda Silahlı Qüvvələr parlament nəzarətindən kənarda saxlanıla bilməz. O, qanun layihəsində Silahlı Qüvvələrin hərbi qulluqçularının hərbi xidmət vəzifələrinin icrası maddəsinə yeni maddənin əlavə olunmasını təklif etdi.
“Yeni hazırlanan qanundan da görünür ki, Azərbaycan Ordusu Cənubu Qafqazın ən güclü ordusuna çevrilib”. Milli Məclisin ÜZVÜ Siyavuş Novruzov belə dedi. Bildirdi ki, indiki dövrdə bu qanunun hazırlanması və tez bir zamanda qəbuluna ehtiyac var. O, bir neçə gün öncə Kollektiv Təhlükəsizlik Müqaviləsi Təşkilatının toplantısında yeni silahlı birləşmələrin yaradılması haqqında qərar qəbul edildiyini xatırlatdı.
Millət vəkili qeyd etdi ki, Azərbaycan ordusu həm fiziki, həm də mənəvi hazırlıq baxımından yüksək əhval-ruhiyədədir. Ölkəmizin ərazilərinin işğaldan azad edilməsinə hazırdır. Qeyd edək ki, Silahlı Qüvvələrə ictimai nəzarət edilməsi ilə bağlı təklifi bir neçə deputat irəli sürüb.
Layihə səsə qoyularaq ilk oxunuşda qəbul olundu.

Видео “SİLAHLI QÜVVƏLƏR HAQQINDA” YENİ QANUN İLK OXUNUŞDA QƏBUL OLUNUB канала CBC TV Azerbaijan